Búgin birneshe jyldan beri jyr bolyp kele jatqan ýtıl alymnyń máselesi Májilis minberinde kóterildi. Biraq Májilis depýtaty Nartaı Aralbaıulynyń suraǵyna Ónerkásip jáne qurylys mınıstri Qanat Sharlapaev jaýap bermeı qoıdy.
MEN NE DEIMIN, DOMBYRAM NE DEIDI?
Depýtat Nartaı Aralbaıulynyń aıtýynsha, ýtılalym men alǵashqy tirkeýdiń máselesi júzdegen myń azamatty alańdatyp, onyń sheshilýin talap etip otyr. Áıtse de ol bul preblemanyń sheshilýine Ónerkásip jáne qurylys mınıstriligi kedergi keltirip otyrǵanyn eskertti.
– Bul jóninde depýtattyq saýal joldap, keıin birneshe depýtattarmen birge dóńgelek ústel ótkizdik. Sol jıynda qarjy, ekologııa, aýyl sharýashylyǵy, Ulttyq ekonomıka jáne ishki ister mınıstrligi ókiliniń bári tólemderdiń azaıýýyna qarsy emes ekenin aıtty. Ózińiz basqaratyn Ónerkásip jáne qurylys mınıstriliktiń komıtet tóraǵasy «Bul tólemder qajet, sondyqtan da ol saqtalýy kerek» dep qaldy. Odan keıin men «Naqty qandaı sebeptermen saqtalý kerek ekenin resmı túrde aıtyńyzdar» dep 7 kún ýaqyt berdim. Ótken seısenbi kúni ol ýaqyt ótti. Sizdiń mınıstrlikten bir de bir hat, resmı jaýap alǵan joqpyz. Tólemderdiń tómendeýine nege qarsysyzdar, onyń qandaı negizdemeleri bar, nege jaýap berýden bas tartyp otyrsyzdar jáne halyqqa ashyq túsindiretin dıalog nege júrgizilmeıdi, – dedi depýtat.
Bir qyzyǵy Qanat Bısımbaıuly Májilis depýtatynyń suraǵy búgingi taqyrypqa eshqandaı qatysy joq ekenin aıtyp, jaýap berýden jaltardy.
– Men sizge naqty jaýap beremin, biraq meniń aıtqanym boıynsha, sizdiń suraǵyńyz búgingi taqyrypqa eshqandaı qatysy joq. Sizben jeke kezdesip, jaýap beremiz, – dedi ol.
«KÁSIPORYNDY SAQTAÝ ÚShIN BAǴANY TÚSIRMEÝ KEREK»
Májilistiń jalpy otyrysynan keıin jýrnalıster Qanat Sharlapaev jaýap bergisi kelmegen suraqty qaıta qoıdy. «Májilis depýtaty Nartaı Aralbaıuly ýtıl alymnyń baǵasyna Ónerkásip jáne qurylys mınıstrligi ǵana qarsy bolyp otyrǵanyn aıtady. Ýtıl alymnyń baǵasyn túsirýge nege qarsy bolyp otyrsyzdar?»
– Qazirgi tańda ýtıl alym boıynsha eshqandaı ózgeris jasamaımyz. Men Ónerkásip jáne qurylys mınıstrimin. Meniń eń basty jumysym kásiporyndardy damytyp, onyń qýattylyǵyn artyrý. Qazirgi tańda Qazaqstanda eki avtokólik shyǵaratyn zaýyt salyp jatyrmyz. Atalǵan avtokólik óndiris salasynda qanshama adam jumys isteıdi. Ony eshkim esepke alyp otyrǵan joq. Bir zaýyt 2025 jyldyń ortasynda aıaqtalady, ekinshi zaýytta jylyna 90 myń kólik óndiriledi. Zaýytta eńbek etetin azamattardyń jumys oryndaryn kim saqtaıdy? Men depýtattarǵa osy suraqty qoıdym jáne taǵy da qoıamyn. Túrkııa sekildi basqa elderde mashınanyń baǵasy bizben salystyrǵanda joǵary nemese teń bolýy múmkin. Sondyqtan da biz ózimizdiń kásiporyndy, ózimizdiń azamattardyń jumys ornyn saqtaý úshin baǵany túsirmeýimiz kerek, – dedi mınıstr.
Eki jyl buryn Prezıdent Toqaev «shekten shyqpaı» ýtıl alym qaıta qaralatynyn aıtqan. Bıylǵy naýryz aıynyń basynda bir top adam mınıstrlikke arnaıy «ýtıl alym alynsyn» degen talappen júgingen bolatyn.
Shynar Aqjanqyzy
