Franııa prezıdenti Makron «Vılaıat Horasan» lańkestik tobynyń Franııada birneshe terakt jasamaq bolǵanyn málimdedi, dep habarlaıdy "Adyrna" ulttyq portaly Nemis tolqyny (DW) radıosyna siltep.
Máskeýde Krokýs Sıtı Hollda atys uıymdastyryp, júzden asa adamnyń ómirin qıǵan qandy shabýyldy "Vılaıat Horasan" toby uıymdastyrǵan.
Qylmysty óz moınyna alǵan lańkestik toptyń uıashyǵy buǵan deıin de Franııada birneshe terakt jasaýǵa árekettengen bolyp shyqty.
«Sońǵy aılarda bul top bizdiń aýmaqqa birneshe ret áreket jasady», - dedi Franııa prezıdenti Emmanýel Makron 25 naýryz kúni.
Makron lańkestik áreketterdiń qashan jáne qalaı jasalǵany týraly tolyq málimet bermedi. Odan bólek Franııada jaqyn arada eshqandaı lańkestik áreketterdiń tosqaýyldary týraly habarlamalar taramaǵan.
Alaıda, Crocus-qa jasalǵan shabýyldyń erteńine Franııadaǵy lańkestik qaýip deńgeıi barynsha joǵarylaǵany belgili boldy.
Al Germanııa úkimeti Krokýs Sıtı Holldaǵy teraktini «Islam memleketiniń» Aýǵanstandyq bólimshesiniń sodyrlary jasady dep esepteıdi. «Vılaıat Horasan» toby buǵan deıin Aýǵanstannyń syrtynda birneshe ret soqqy jasaǵan bolatyn.
Reseı prezıdenti Vladımır Pýtın Krokýs shabýylyna IM-niń jaýapkershilikti moınyna alýyna ázirge túsinikteme bermeı, oqıǵany Ýkraınamen baılanystyrýda. Degenmen Kıev úkimeti «Krokýs» shabýylyna qatysy joq ekenin aıtty.
