Bügın - Jeltoqsan oqiǧasynyŋ qūrbany Erbol Sypataevtyŋ tuǧan künı, dep habarlaidy "Adyrna" tılşısı.
1986 jylǧy Jeltoqsan köterılısı talai belsendınıŋ ömırın qyrşynnan qidy. Qazaq jastary alaŋǧa ölım ızdep emes, ädıldık sūrap jinalǧan. Jeltoqsannnyŋ mūzda janǧan alauy, eldıktı közdegen jas-belsendınıŋ bırı - Erbol Sypataev. Ol turaly derekter öte az bolǧanymen halyqtyŋ jüregınde saqtalǧan.
Erbol Sypataev - Almaty oblysy sol kezdegı Panfilov audany Eŋbekşı auylynda 1964 jyly düniege keldı. Jeltoqsan köterılısı tūsynda Almatynyŋ energetika institutynyŋ 2-şı kursynda oqyǧan.
"QazaqKSR Joǧarǧy Sovetı prezidumynyŋ Almaty jäne Qazaqstannyŋ özge oblystaryndaǧy 1986 jylǧy Jeltoqsan oqiǧalaryna tiıstı baǧa beru jönındegı komissiia korytyndysy" boiynşa derekterde:
"Taǧy bır qaiǧyly jaǧdai — alaŋda basynan jaraqattanyp, keiın qaza bolǧan Almaty energetika institutynyŋ studentı E.M. Sypataevtyŋ ısı. Onyŋ äke-şeşesı joq, tuysqandary ǧana bar. Bıraq olar Almatyǧa şaqyrylmaǧan. Qaza turaly anyqtamany auruhanadan MQK qyzmetkerı alady. Sosyn ol milisiia qyzmetkerlerımen bırge mürde salynǧan tabytty tuysqandary tūratyn jerge alyp jüredı. Tün ışınde keledı, aldyn ala habarlanǧan tuysqandary olardy aldynan şyǧyp kütıp alady. Olarǧa jıgıttı alaŋda jaraly küiınde tauyp alǧandaryn, auruhanada ölgenın, öltırgen adamnyŋ belgısız ekenın, qazır būl ıspen prokuratura ainalysyp jatqanyn tüsındıredı. Prokuratura şynynda da ıs qozǧady, bıraq ol onyŋ ölımı turaly emes, oqiǧalarǧa qatysy jönınde edı, «aiyptaluşynyŋ» kazasyna bailanysty ıs jabylady", - delıngen.Erbol Sypataev 1986 jyly 23 jeltoqsanda 22 jasynda auruhanada jaryq düniemen qoştasty. Közı tırı bolǧanda ol 60 jasqa tolar edı. Erbol Sypataevtyŋ tuǧan künıne orai Almaty energetika jäne bailanys universitetınde 6 nauryz künı marqūmdy eske alu keşı öttı. Jiynǧa marqūmnyŋ tuystary, qoǧam qairatkerlerı, Almaty qalalyq Qoǧamdyq damu basqarmasy basşysynyŋ orynbasary Baǧlan Töleuhan, universitettıŋ oqu ısı jönındegı prorektory Aigül Särenova, äleumettık pänder kafedrasynyŋ meŋgeruşısı Bolat Qabduşev pen JOO studentterı qatysty. Erbol oqyǧan kezde būl oqu oryny Almaty energetikalyq instituty dep atalatyn. Şarada söz söilegender memlekettegı maŋyzdy oqiǧalar turaly estelıkterımen bölısıp, Erbol Sypataevtyŋ janqiiarlyǧyn, sondai-aq «patriotizm» ūǧymynyŋ san qyrly mänı bar ekenın, onyŋ ışınde tuǧan jerge degen süiıspenşılık turaly söz qozǧady.
"Jeltoqsan oqiǧasy bolǧan jyldary Erbol Sypataev bızdıŋ Almaty energetika jäne bailanys universitetınıŋ 2 kurs studentı bolatyn. Onyŋ tragediiasy bükıl elge belgılı. Ärine, universitetımızde naǧyz batyr Erbol Sypataevty eske alyp, onyŋ esımın tarihta qaldyru üşın qyruar ıster atqaryldy. E.Sypataev atyndaǧy oqu zaly aşyldy. Jyl saiyn bız batyrdy eske alyp qana qoimai, özınıŋ myqty erık-jıgerı men qaisarlyǧynyŋ arqasynda erlık pen jankeştılıktıŋ ülgısıne ainalǧan Erbol Sypataevtyŋ erlıgın şäkırtterımız ben jaŋadan kelgen studentterımızge eske tüsıru maqsatynda eske alu şaralaryn ötkızuge tyrysamyz", - dedı äleumettık pänder kafedrasynyŋ meŋgeruşısı Bolat Qabduşev.
Ūqsas jaŋalyqtar
