Aqtóbe oblysyndaǵy tasjolda bolǵan jantúrshigerlik jol apatyna qatysty jańa derek shyqty, dep habarlaıdy "Adyrna" tilshisi Dalanews-qa siltep.
Adam ólimimen aıaqtalǵan jol apaty kúni keshe boldy.
Oblys ákimdiginiń Telegram-arnasyndaǵy jazbaǵa sáıkes Aqtóbe - Astrahan tasjolynyń 120 shaqyrymynda Lada Largus jáne Toyota Hilux markaly eki kólik soqtyǵysqannan soń Lada Largus kóligi órtengen.
"2024 jylǵy 6 naýryzda Aqtóbe oblysynyń "Aqtóbe-Astrahan" tasjolynda 120 shaqyrymynda kólik apaty boldy. Zardap shekkenderdiń sany – 11, onyń ishinde 8 adam qaza tapty. 3 adam Muǵaljar aýdandyq aýrýhanasyna jetkizildi. Mamandar olarǵa qajetti kómekti kórsetip, tekserdi. Alaıda, 3 adam Aqtóbe qalasynda "tekserýden ótemiz" dep, aýrýhanaǵa jatýdan bas tartqan", - dedi Aqtóbe oblystyq densaýlyq saqtaý basqarmasy basshysynyń mindetin atqarýshy Nurbol Tympıev.
Oblystyq bilim basqarmasy basshysynyń orynbasary Nurgúl Bertileýova da oqıǵaǵa qatysty pikir bildirdi.
"Búgin Aqtóbe-Astrahan tasjolynda qaıǵyly jol-kólik oqıǵasy boldy. Osy qaıǵyly oqıǵa saldarynan 8 adam qaza tapty. Onyń tórteýi kámeletke tolmaǵan balalar. Atap aıtqanda, Shubarshy orta mektebiniń 4-6-synyp oqýshylary. Sondaı-aq Keńqııaq orta mektebiniń 6-synyp oqýshysy men daıyndyq tobynyń 1 oqýshysy. Balalardy ata-analary men týystarymen birge boldy. Oqýshylar zańdy ókilderiniń ótinishi boıynsha otbasylyq jáne densaýlyq jaǵdaıyna baılanysty sabaqqa qatyspaǵan", - dep túsindirdi Nurgúl Bertileýova.
