«Atamūra» baspasy Facebook jelısınde Dosai Kenjetaidyŋ «Älıppege» qatysty beinejazbasyna tüsınıkteme berdı, dep habarlaidy «Adyrna» tılşısı.
«2022 jyldyŋ 8 qaraşa künı Dosai Kenjetai öz paraqşasynda «Qaitqan «Älıppe» turaly» degen taqyryppen beinejazba bergen bolatyn. Sol şyndyqqa janaspaityn beinejazbany tüsınbesten basqa paraqşa ielerı däl bügınge deiın 84 ret köşırıp jariialap otyr. Būǧan deiın «Atamūra» baspasy men Respublikalyq ǧylymi-praktikalyq bılım mazmūnyn saraptau ortalyǧy: «...qaitqan Älıppe» dep kezdeisoq adamnyŋ videosyndaǧy kıtapty köpşılıkke jariialauyŋyz dūrys bolmady. Sondyqtan paraqşaŋyzǧa osy postty terıstep jazyp, videony öşıruıŋızdı sūraimyz», – dep jazǧan bolatyn. Ötınıştıŋ eskerusız qaldyruyna bailanysty «Atamūra» korporasiiasy osy jazbaǧa qatysty öz narazylyǧyn taǧy da beinejazba avtoryna joldaidy»,—delıngen habarlamada.
Baspa negızsız jazbalar köpşılıktı şatastyratynyn atap öttı.
«Baiybyna barmaǧan baibalam mektep oquşylarynyŋ ata-analaryn, bükıl qoǧamdy şatastyrady. Beinejazbada özı körınbeitın äiel, şamasy, oquşynyŋ anasy şyǧar, äldebır «Älıppe» degen kıtapty paraqtap, onyŋ betındegı ärıp pen atauy sol ärıpten bastalatyn aŋdy körsetıp, «būl sauatyn aşatyn qazaq balasyna sai emes» dep synaidy.
«P» ärpıne pandany, «U» ärpıne uly jylandy bır bet etıp salǧan «Älıppenı», anyǧynda «Älıppe-symaqty» mülde basqa baspa şyǧarǧan. Ärı ol mektep baǧdarlamasynyŋ resmi oqulyǧy emes. Beinejazbada sausaǧy men dauysy bar äieldıŋ osynyŋ aq-qarasyn ajyratuǧa zerdesı jetpegen şyǧar, al belgılı joǧary oqu ornynyŋ bıldei professorynyŋ «Qaitqan «Älıppe» turaly» dep tüsınık bere otyryp, ony öz paraqşasyna qoiǧany qalai?»,—dep jazdy korporasiia.
«Atamūranyŋ» mälımdeuınşe, beinejazbadaǧy kıtap jalpy bılım beretın mekteptıŋ 1-synybyna arnalmaǧan.
«Qalyŋ qauymnyŋ talap etuımen 2021 jyly «Älıppe» mektepke qaita oraldy. Mektep tabaldyryǧyn attaǧan jas ūrpaq sol «Älıppe» arqyly bılım aludy bastaǧaly üşınşı oqu jyly ötıp jatyr. Bıraq aty-jönı belgısız äieldıŋ sausaqtary körsetıp tūrǧan, Dosai Kenjetai myrza «Qaitqan «Älıppe» dep mysqyldaǧany Oqu-aǧartu ministrlıgı ūsynǧan, jalpy bılım beretın mekteptıŋ 1-synybyna arnalǧan «Älıppe» emes.
Şyndyǧynda, «Atamūra» baspasynan şyǧyp, büldırşınderımızge qaita oralǧan jaŋa «Älıppe» mülde basqa.
Saraptamadan ötpegen, ministrlık tızımıne enbegen kez kelgen kıtap nemese kıtapşany «Älıppe» dep halyqqa ūsynuǧa bolmaidy. «Älıppe» atauymen şyqqan būl kıtapşa qoldanystaǧy «Älıppege» üş qainasa sorpasy qosylmaidy. Türkıstandaǧy universitet professory Dosai Tūrsynbaiūly Kenjetai myrzanyŋ mūndai baiybyna barmaǧan baibalamdy nege paraqşasyna şyǧarǧany tüsınıksız. Oǧan «Qaitqan «Älıppe» turaly» dep öz tarapynan söz qosqany – jalǧan aqparat taratu bolyp sanalady. QR Qylmystyq Kodeksınıŋ «Körıneu jalǧan aqparat taratu» 274-baby boiynşa Dosai Tūrsynbaiūly Kenjetaidyŋ äleumettık jelıde jalǧan aqparat taratqany üşın zaŋ aldynda jauap beruın talap etıp, qūqyq qorǧau organdaryna jügınetınımızdı habarlaimyz»,—dep tolyqtyrdy baspa.
