Astana qalasynyń ákimi Jeńis Qasymbek qaladaǵy qoqys shyǵarýmen aınalysatyn Álııa Nazarbaevanyń kompanııasyna qatysty suraqqa jaýap berdi, dep habarlaıdy "Adyrna" ulttyq portaly Tengrinews saıtyna silteme jasap.
Ákim Clean City NC kompanııasymen jasalǵan kelisimsharttyń merzimi qashan aıaqtalatyny týraly suraqqa naqty jaýap berdi.
"Bıyl bul kompanııamen kelisimshart aıaqtalady. Ol búginde búkil qala boıynsha jumys istep jatyr. Onymen kelisim 5-6 jyl buryn jasalǵan bolýy kerek. Osy jyldan bastap sáýirdiń basynda baıqaý jarııalaýdy josparlap otyrmyz. Qalany bes aýdanǵa bólemiz. Qala eki ese ósti, sáıkesinshe turǵyndar sany da ósti. Bir jyl ishinde kún saıyn shamamen 1,5 myń tonna qatty turmystyq qaldyqtar jınalady", - dedi Astana qalasynyń ákimi.
Onyń aıtýynsha, tek bir ǵana kásiporynnyń qýaty endi búkil qalany qamtamasyz etýge qaýqarsyz. Sondyqtan endigi jospar boıynsha basqa da qoqys shyǵaratyn kompanııalar jumysqa tartylady.
"Biz bes aýdan boıynsha qoqyspen aınalysatyn merdigerlik uıymdardy anyqtaýdy josparlap otyrmyz. Mindetti shart - tehnıkanyń bolýy. Búginde úzilister mezgil-mezgil bolyp turady, ózderińiz bilesizder, ásirese Nura aýdanynda. Bul kompanııanyń 3-4 jyl buryn bolǵan tehnıka kólemine baılanysty. Olar 80 kólikpen bastady, qazir de shamamen sondaı, sál kóbirek. Bizge qalany tazartý úshin 150-160 mashına qajet. Sondyqtan, basqa kompanııalardy barynsha tartamyz, kem degende 3-4 kompanııa qalada jumys isteıdi dep kútemiz", - dep Jeńis Qasymbek aldaǵy josparmen bólisti.
"Adyrna" ulttyq portaly
