Almaly aýdandyq sotynda óziniń áriptesin abaısyzda atyp óltirgen polıeıge úkim shyqty. Bul týraly Almaty qalasynyń soty málimdedi, dep habarlaıdy “Adyrna” ulttyq portaly.
Aıta keteıik, qaıǵyly oqıǵa byltyr jazda bolǵan edi.
«Sottalýshy ǵımaratty kúzetý boıynsha aýysymǵa kelgen. Ári qaraı onyń áriptesi tabeldik qarýdy alǵannan keıin K. esimdi sottalýshydan belbeýin bekitý úshin qarýdy ustaı turýyn ótingen. Tabeldik qarýdy alǵan sottalýshy ony qoldanýdyń barlyq erejelerin elemeı, tómen jáne joǵary terbete bastaǵan. Saldarynan sottalýshynyń abaısyzda atqan oǵy marqumnyń basyna tıgen», - delingen qalalyq sot habarlamasynda.
Sottalýshy óz kinásin tolyq moıyndap, jasaǵan isine ókingen. Al prokýror ony 1 jyl 6 aıǵa bas bostandyǵynan aıyrý jazasyn suraǵan.
«Sot Qylmystyq kodekstiń 104-baby 1-bóligimen sottalýshyny 1 jyl 6 aı bas bostandyǵynan aıyrýǵa úkim shyǵardy. Odan jábirlenýshiniń týystaryna 10 mln teńge moraldyq zalal jáne shamamen 3,5 mln teńge materıaldyq zalal óndirip alyndy», - dep málimdedi vedomstvo.
