Yqylas Orazbaıuly: "Ýyzdaı jap-jas bir qyzdyń, Ýysynda ǵana ekem ǵoı.."

254

Yqylas Orazbaıuly 1983 jyly QHR Shınjııan ólkesi, Kóktoǵaı aýdany, Dúre aýylynda dúnıege kelgen. 2007 jyly Ile pedagogıka ınıstıtýtyn támámdaǵan. Shınjııan halyq radıosynan «Sen meni aldamadyń», «Aı músini» atty radıo teatrlary jáne basqada merzimdik basylymdarda 80 nen astam óleń, áńgime, maqalalary jaryq kórdi.

Shınjıań kóleminde ótken “Jasdáýren-Óren” jyr múshaırasynyń jáne Dúnıe júzi qazaq qaýymdastyǵynyń 20 jyldyǵyna oraı ótkizilgen halqaralyq jyr múshaırasynyń bas júldegeri.
Aqyn qazyr otbasyman Qazaqstanǵa qonys aýdaryp, ata jurtynyń bir kirpishi bolyp qalanýda.

Baqyt

Ómir jolyn san shıyrlap salpaqtap,
Árbir pende baqyt tappaq, bal tatpaq.
Men de otyrmyn..
avtobýzǵa lyq tolǵan,
Adamdarǵa jaltaqtap.

«Bir sulý qyz kezdespegen kósheni,
Kóshe dep te keregi joq esebi. »
Dep Qýanysh atty meniń aǵamnyń
Aıtqan sózi qulaǵymda keshegi.

Aıaldama kez boldy ma sálden soń,
Aıdaı kúlip kirip keldiń sáýlem sen.
Ekinshi bir jan bar dese de senbes em,
Dál ózińnen sál kórkem.

Sen bolmasań aı nuryna shombas em,
Sen bolmasań qaıǵyly da bolmas em.
Bir jalt etken arman bolyp qaldyń da,
Til qatpastan túsip qaldyń jolda sen.

Elesińdi kirpigime túnetem,
Men ózińdi sol arada kúzetem.
Baqyt degen avtobýzda jolyǵyp,
Jolda túsip qalatuǵyn qyz eken.

Kóktem

Shek barma eken qudyrettiń isinde,
Men dalama aınalyppyn túsimde.
Mańdaılarym márt, asqaq
Aınalypty jalama quz jartasqa.
Janarymda jaıyn týlap, aı túnep,
Qabaǵymda qaıyń, taldar boı túzep.
Keńsirikti jupar, jumbaq án keýlep,
Mıyǵymda mıllıon gúlder sánge órlep.
Erinimde aqsha bulttar damyldap,
Iegimde aqqý, qazdar mamyrlap.
Taýǵa aınalǵan tanaýymdy kún óbip,
Murttarymnyń arasynan buǵy órip.
Sol qulaǵym bórilerge apan bop,
Oń qulaǵyma duǵa oqypty apam kep.
Oń qolymda qoıshy jigit ysqyryp,
Sol qolymda sulý qyzdar is tigip.
Kóbelerimniń kók kireýke muzy erip,
Alaqanymda arý atandar kúzelip.
Aıaǵymda kósh kerýeni baqytty,
Jyl qustaryn ertip kele jatypty.
Ekpinimen teńseltip jer besikti,
Dál keýdemnen mıllıon jylqy ótipti.
Jaly jalyn, ot ornyndaı tuıaqty,
Tulparlardan daýyl turǵan sııaqty.
Daýyl ǵajap bir aýnatyp ólkeni,
Shyryn tústiń jyrtylypty jelkeni.
Tús túńligi jyrtylǵanda orasan,
Oıana sap jan- jaǵyma qarasam.
Tósqaltamnan telefonym tepkilep,
Bezekteıdi bir ıgnal kepti dep.
Telefondy dir- dir etken, dir etken,
Qolyma aldym tulpardaı bir júrekpen.
Álim jetpeı daýysymdy da túzeýge,
Dirildep ketti saýsaǵym,
Dirildep ketti tizem de.
Batyldanar da ezbelep,
«Maquldan» aryǵa sóz de joq.
Tutyǵa berdim ásheıin,
Tuqyra berdim ásheıin,
Aıaǵymmenen jer qasyp,
Shyqshytty shylqa ter basyp.
O, darıǵa-aı. . .
Túsimde taý bop ketsemde,
Ómirde dáý bop ótsemde.
Beker eken ǵoı, beker ǵoı,
Ýyzdaı jap-jas bir qyzdyń
Ýysynda ǵana ekem ǵoı.

Seni sulý degendik…

Kózderińdi óleń ǵyp,
Sózderińdi óleń ǵyp,
Alqynbaımyn men endi.
Seni sulý degendik-
Aqqýdy aq qus degendik.

Qulatyp jyr kóshkinin,
Qulamaımyn kesh, kúnim.
Aqyldy dep seni aıtý
Aýylyńa eski uǵym.

El men jurtty máz etip,
Alqaý bálkim ádeti.
Arý ánshi dep jazdy,
Aımaǵyńnyń gazeti.

Maıda tilmen óbekteı,
Án de arnaldy kóp ótpeı.
Saǵan qala syılaý da,
Esh jańalyq emes qoı.

Shorshyp júrek qolqamda,
Aýaǵa ilip qoltańba.
"Seni súıem" dep aıttym
Myń birinshi bolsam da.

Ótinishimdi órgende
Qol jetkendeı órdenge,
Kóp kúttim dep bul sózdi
Kúlgenińdi kórgende.

Tátti tilmen baldan da,
Súıip meni alǵanda,
Talyp qalar edim ǵoı,
Oıanyp ketpeı qalǵanda.

Takapparlyq ta seniń tek,
Joldasyń-aý dep jorýshy ek.
Sol joly qudaı saqtady,
Saqtamasada bolýshy ed.

Manaýrap kún de sónerde,
Mama qaz bulttar shógerde.
Meni de súıe qalsań sen,
Óńim bop sol sát egerde.

Kóńilge múlde ornap sen,
Kóńildi múlde torlap seń.
Bıikten kıik kórgendeı
Ańqaıa ǵashyq bolmas pa em.

Takapparlyq ta seniń tek,
Joldasyń- aý dep jorýshy ek.
Sol joly qudaı saqtady,
Saqtamasada bolýshy ed.

Mennen góri sen oǵan kóp qaraısyń

Mennen góri sen oǵan kóp qaraısyń,
Ǵashyǵyń ba ol janyńdy órtke oraıtyn.
Áńgime aıtyp, ashylyp syrlaspaǵan,
Qyzyqsyzdaý ózińmen ótken aı-kún.

Mennen góri sen oǵan kóp sóıleısiń,
Berilip, beıimdelip ketkendeısiń.
Keı sózimdi aıtqanmen estimeısiń,
Keı sózdi estiseń de eskermeısiń.

Mennen góri sen ony kóp tyńdaısyń,
Ońasha qalǵanda da tek turmaısyń.
Basqany qoıa turshy dep ótinsem,
«Ne bola qaldy sonsha?» dep týlaısyń

Eshkim de joq janyma eter medet,
Aramyzdy endi ne lekerlemek?!
Syry joq adamdardan alańdaımyn,
Ómirden óstip syrǵyp keter me dep.

Kim ózi ol kórgen saıyn qunyqtyrǵan,
Qabyrǵańnan qarmaǵy ilip tynǵan.
Balalarǵa asyǵyn laqtyrtyp,
Adamdarǵa ǵashyǵyn umyttyrǵan.

Mennen góri sen ony kóp sıpadyń,
Emi qonbas endigi esh shıpanyń.
Ary qarap ketken sol adamdarǵa,
Ber jaǵynan kerek pe, bet sıpaýym.

Men seniń jek kóremin telefonyńdy…!

 

"Adyrna" ulttyq portaly

Pikirler