AQSh qorǵanys mınıstrligi Ýkraınanyń shyǵysynda reseıshil separatısterge qarsy kúres júrgizip jatqan úkimet kúshterine 250 mıllıon dollardyń áskerı kómegin beredi. Pentagon bul týraly málimdemesin 18 maýsymda resmı saıtynda jarııalady.
Pentagonnyń habarlaýynsha, jańa transh aıasynda Ýkraınanyń áskerı-teńiz kúshteri men armııasyna ásker qural-jabdyqtar beriledi, qosymsha oqý-jattyǵýlar ótkiziledi. Málimdemede bul seriktestikke Ýkraınadaǵy reformalar negiz bolǵany, onyń nátıjesinde Ýkraına áskeri NATO standarttaryna jaqyndaı túskeni aıtylǵan.
Reseı Ýkraınanyń shyǵysyndaǵy separatısterge túrli áskerı qural-jabdyqtarmen, sonyń ishinde 450 tanki jáne 700 aýyr tehnıkamen kómektesip otyr dep málimdedi AQSh-tyń Ýkraınadaǵy burynǵy elshisi Djon Herbst. Ol muny Pentagonnyń málimdemesinen keıin, AQSh senatynyń halyqaralyq qatynastar komıtetinde ótken tyńdaýda aıtty.
AQSh 2014 jyldan beri Ýkraınaǵa quny 1,5 mıllıard dollarǵa jýyq áskerı kómek kórsetken. Áskerı kómektiń negizgi maqsaty – Ýkraınany Reseı agressııasynan qorǵaý jáne ýkraın armııasyn reformalaýǵa septesý.
"Azattyq" radıosy
