Jer silkinisi ońtústikten soltústikke baǵyttalǵan, sondyqtan áseri Ortalyq Qazaqstanda da sezildi, dep jetkizdi ǵylym jáne joǵary bilim mınıstri Saıasat Nurbek. Bul týraly “Adyrna” ulttyq portaly habarlaıdy.
"Jer silkinisi Qyrǵyzstan men Qytaı shekarasyna jaqyn, 250 shaqyrym jerde bolǵan. Aftershok – seısmıkalyq tolqyn – óte úlken, Rıhter shkalasy boıynsha 6,5-7 boldy, sondyqtan áseri Ortalyq Qazaqstanda da sezildi. Dúmpý dál ońtústikten soltústikke qaraı baǵyttaldy, dúmpýden tolqyn kóterildi, sondyqtan olar munda óte álsiz bolsa da baıqaldy", – dedi Saıasat Nurbek seısenbi kúni Úkimette ótken brıfıngte.
Mınıstr elorda turǵyndary jer silkinisinen qorqý kerek pe degen suraqqa Astana Turan platformasynda ornalasqandyqtan, qorqýdyń qajeti joq ekenin de jetkizdi.
Esterińizge sala keteıik, 23 qańtarǵa qaraǵan túni Almaty turǵyndary jer silkinisin sezindi. Keıin jer silkinisiniń kúshi 5 ball bolǵany belgili boldy.
“Adyrna” ulttyq portaly
