Jambyl oblysynda Jıdeli-Birlik aralyǵynda poıyz adamdardy basyp ketti. Eki temirjol qyzmetkeri qaza tapty. Bul týraly Qazaqstan temir jolynyń baspasóz qyzmeti málimdedi, dep habarlaıdy “Adyrna” ulttyq portaly.
Málimet boıynsha, 21 qańtarda saǵat 7:27-de Shyǵanaq-Shý ýchaskesiniń Jıdeli-Birlik aralyǵynda jazataıym oqıǵa bolǵan. Saldarynan eki qyzmetker qaza boldy.
Poıyz mashınısi jedel tejeýdi iske qosqan, alaıda qaıǵyly jaǵdaıdyń aldyn alý múmkin bolmaǵan.
"Barlyq mán-jaıdy anyqtaý úshin oqıǵa ornyna QTJ komıssııasy bardy. Tekserý bastaldy. QTJ qyzmetkerlerdiń otbasylaryna shyn júrekten kóńil aıtady jáne olarǵa qajetti kómek kórsetedi", - delingen resmı jaýapta.
