"Maıqaıyń altyn" kenishinde jerge qulaǵan avtobýsty izdeý jumystary jalǵasýda, dep habarlaıdy "Adyrna" tilshisi.
Maıqaıyńda mamandar jerge qulaǵan avtobýsty 17 kúnnen beri izdeýde. 19 qańtar kúni izdestirý jumystarynyń barysyn pysyqtaý maqsatynda opyrylǵan jerge qaıta geoskanerleý júrgizildi. Shuńqyrǵa ekinshi ekskavator da túsirilgen.
Pavlodar oblystyq TJD baspasóz qyzmetiniń habarlaýynsha, shaǵyn gabarıtti ekskavator 850 tekshe metrge jýyq topyraqty qaıta qazyp, ekinshi ekskavator oryndy keńeıtti.
"20 qańtarda barlyq qaýipsizdik erejelerin saqtaı otyryp, eki ekskavatordyń kómegimen tik jáne kóldeneń saqtandyrý, júrgizýshisi bar ekinshi shaǵyn gabarıtti ekskavator túsirildi. Ol avtobýs júretin jerden iri gabarıtti tastardy alyp jatyr", – dep habarlady oblystyq tótenshe jaǵdaılar departamentiniń baspasóz qyzmeti.
Búginde Maıqaıyńdaǵy izdeý jumystaryna 147 adam, 45 tehnıka, úsh kınolog jáne eki ushqyshsyz ushý apparaty jumyldyrylǵan.
Oqıǵa ornynda jumys istep jatqan qutqarýshylar shuńqyrǵa qulaǵan avtobýstyń bólshekteri men eki adamnyń máıitin tapqan.
