Qoǵamdyq keńestiń kezekti otyrysynda Ermak Sálimov qalanyń 2020-2025 jyldarǵa arnalǵan áleýmettik-ekonomıkalyq damýynyń keshendi josparyn tanystyrdy. Ermak Bıdahmetuly keshendi jospar jobasy memleket basshysy Qasym-Jomart Toqaevtyń tapsyrmasyna sáıkes ázirlengenin atap ótti.
-Halyqty sút ónimderimen qamtamasyz etý úshin Novobajenovo aýyldyq okrýginde 1200 basqa arnalǵan taýarly-sút fermasynyń qurylysyn qarastyryp otyrmyz, - dedi qala ákimi. - Biz shilde aıynyń basynda atalǵan jobany iske asyratyn kompanııaǵa jer ýchaskesin bekitý boıynsha konkýrs jarııalaımyz. 2025 jylǵa qaraı jalpy aýyl sharýashylyǵy ónimi 19 paıyzǵa artady.
E. Sálimov aldaǵy jyldarda Semeıde 4 jańa mektep pen 4 balabaqsha salý josparlanyp otyrǵanyn aıtty. Oqý jáne mektepke deıingi mekemeler Stepnoı, Vostochnyı, Bobrovka, Voshod kentterinde jáne Qaraǵaıly jańa shaǵyn aýdanynda salynady.
- Qaraǵaıly jańa shaǵyn aýdanynda bilim men tehnologııa transferti ortalyǵynyń qurylysy josparlanǵan, - dedi Ermak Bıdahmetuly. – Bul mádenıetti damytýǵa arnalǵan oqýshylar men Jastar saraıy bolady. Onyń qurylysy oblys basshylyǵy deńgeıinde talqylandy. Sondaı-aq osy shaǵyn aýdanda órt sóndirý deposyn salý josparda bar.
Keshendi jospar sheńberinde jalpy somasy 3 mlrd.teńgege 20-dan astap jalpy bilim beretin mektepte kúrdeli jóndeý josparlanǵan. Mádenıet nysandary da kúrdeli jóndeýden shet qalmaıdy. Dostyq úıinde, drama teatrda, F. Dostoevskıı atyndaǵy murajaıda, ólketaný murajaıynda, Abaı atyndaǵy ámbebap kitaphanada jóndeý jumystary júrgiziledi. Nevzorovtar otbasy atyndaǵy beıneleý óneri murajaıy ǵımaratynda qalpyna keltirý jumystary josparlanǵan.
-Jol ınfraqurylymyn jaqsartý jáne kólik pen jaıaý júrginshiler qozǵalysynyń qaýipsizdigin qamtamasyz etý maqsatynda avto kópirdi qaıta jańartý, sondaı-aq qala joldaryn jóndeý boıynsha jobalar josparǵa engizildi. Joǵaryda kórsetilgen jobalardy iske asyrý 2025 jylǵa qaraı jaqsy joldardyń úlesin 90 paıyzǵa deıin arttyrýǵa múmkindik beredi, - dedi ákim.
Qalany aınalyp ótetin joldar salynýy, aýyr salmaqty avtokólik qozǵalysyn azaıtýǵa septigin tıgizedi.
Qala kóshelerinde 600-den astam "Sergek"beınekamerasy paıda bolady.
- 2025 jylǵa deıin ortalyq sýmen jabdyqtaýǵa Komsomol, Stepnoı, Úshaqtar, Voshod jáne qaıyq kentteri qosylady , - dedi Ermak Bıdahmetuly.
Sonymen qatar, E. Sálimov Semeı ıadrolyq polıgonynan zardap shekken múgedek balalarǵa arnalǵan ońaltý ortalyǵy Altaı qalasynyń kýrorttyq aımaǵynda salynatynyn aıtty.
Keshendi jospar aıasynda Semeıde 2020 jyldan 2025 jylǵa deıin 133 kóp qabatty turǵyn úı paıdalanýǵa beriledi.
"Adyrna" ulttyq portaly
