Bıyl Qańtar oqıǵasyna 2 jyl toldy. Suıytylǵan gazdyń kenetten qymbattaýyna baılanysty bastalǵan narazylyq sharalary 2022 jyldyń 2 qańtarynda bastaý alǵan edi. Bul oqıǵalar táýelsiz Qazaqstannyń 30-jyldyq tarıhyndaǵy eń qarqyndy ári qatal qaqtyǵysqa aınaldy.
Halyq qala jáne oblys ákimderinen baǵany turaqtatýdy jáne kógildir otynnyń tapshylyǵyn joıýdy talap etti. Bul talaptar oryndalmaǵasyn narazylyq sharalary kelesi kúni de jalǵasyn tapty. 4 qańtar kúni Qazaqstan úkimeti Mańǵystaý oblysyndaǵy suıytylǵan gazdyń baǵasy lıtrine 50 teńgege deıin tómendetilgenin málimdedi. Al prezıdent Qasym-Jomart Toqaev Qazaqstan halqyna úndeý jarııalap, zańsyzdyqty boldyrmaýdy surady.
Jańaózen qalasynda bastalǵan sherý keıinnen Almaty, Aqtóbe, Aqtaý, Atyraý, Qaraǵandy, Astana, Shymkent, Kókshetaý, Oral jáne taǵy da basqa qalalarda jalǵasty. Halyq kóshege shyǵyp, ekonomıkalyq talaptarmen qosa saıası ózgeristerdi talap ete bastady. Bastapqyda beıbit bastalǵan narazylyq sharalary artynan qarýly qaqtyǵystar men tonaýshylyqqa ulasty. 5 qańtarda bastalǵan tártipsizdikter resmı deńgeıde memlekettik tóńkeris dep ataldy.
Qańtar qyrǵyny kezinde Memleket basshysy Qasym-Jomart Toqaev Ujymdyq qaýipsizdik týraly shart uıymy basshylarynan kómek suraǵanyn málimdedi. 10 qańtarda UQK tártipsizdikter kezinde basyp alynǵan barlyq ákimshilik nysannyń qaıtarylǵanyn, eldegi jaǵdaıdyń turaqtalǵanyn málimdedi.
11 qańtarǵa deıin tártipsizdikke qatysyp, qamaýǵa alynǵan adamdardyń sany 10 myńǵa jýyqtady. Tonaýshylyq pen buzaqylyqtyń saldarynan kásipkerlerge keltirilgen shyǵynnyń mólsheri 100 mıllıard teńgeden asty. Oqıǵa boıynsha jalpyulttyq aza tutý kúni jarııalandy.
Bas prokýratýra 238 adam qaza tapqanyn málimdedi. Resmı málimetterge súıensek, jappaı tártipsizdik boıynsha 1205 adam sottalyp, 1095 adamǵa raqymshylyq jasalǵan. Qaıǵyly jaǵdaı kezinde 19 zań oryndary qyzmetkeri qaıtys bolyp, 3 myńnan asa polıııa jáne áskerı qyzmetker jaraqat alǵan.
Qańtar oqıǵasy kezinde Almatyǵa 20 myń «terrorıst» shabýyl jasalǵany da aıtyldy. Alaıda bul aqparat dáleldenbedi.
Bıyl, 3 qańtarda Qasym-Jomart Toqaev «Egemen Qazaqstan» gazetine bergen kólemdi suqbatynda Qańtar oqıǵasy týraly da sóz etti. Aıtýynsha, qasiretti jaǵdaıǵa jyldar boıy qordalanǵan áleýmettik-ekonomıkalyq problemalar, jalpy toqyraýdyń bılik pen qoǵamdy azdyryp-tozdyrýy sebep bolǵan.
«Sol kezdegi ahýal óte kúrdeli boldy, elimiz qurdymǵa ketýge shaq qaldy. Buǵan jol bermeý úshin barlyq is-áreketti kúndiz-túni jáne saǵat saıyn tikeleı ózim baqylap otyrdym. Ishki ister mınıstrligi arqyly Aqorda rezıdenııasyna túrli shabýyl jasalǵaly jatyr, soǵan júk kólikteri paıdalanylady degen aqparat jetti. Maǵan bas saýǵalap, rezıdenııadan ketý, tipti shetel asý týraly usynys birneshe ret aıtyldy. Biraq men buǵan úzildi-kesildi qarsy boldym. Teledıdar arqyly jasaǵan málimdemelerimniń birinde qandaı jaǵdaı bolsa da jumys ornymda qalatynymdy ashyq aıttym. Eki apta boıy tapjylmaı, Aqordada boldym, kún-tún demeı, shuǵyl jınalystar ótkizdim. Sol alasapyran kúnderde memleketimizdi saqtap qalý, eldegi zań men tártip ústemdigin qalpyna keltirý eń basty mindet edi»,—dedi ol.
