Elimizde qys aılary halyq kóteriletin qyzýqandy aılarǵa aınaldy. Buryn jeltoqsan aıy, keıin qańtar qosyldy. Qańtar kelgende Qańtar oqıǵasy oıymyzǵa oralady.
Jańa jyl meıramynan keıin qytymyr qańtardaǵy alasapyrannyń bolǵanyna da eki jyl tolyp otyr. Qanshama qylmystyq is qozǵalyp, aıyptylar jazasyn óteýde. Áleýmettik jelilerde qansha post-podkasttar jazyldy, túsirildi. Almatyda eske salatyn arnaıy eskertkish te ashyldy. Prezıdentimizdiń bastamasymen jaza basyp, bilmeı qatelikke boı aldyrǵan 1205 sottalǵan adamnyń 1095-i osy raqymshylyqqa ilikti.
Prezıdentimiz Qasym-Jomart Kemeluly Toqaev «Egemen Qazaqstan» gazetine bergen suhbatynda qańtar oqıǵasynyń shyndyǵyn taǵy bir ret shegelep aıtty. Eldegi saıası júıeni demokratııalandyrýǵa, qoǵamdyq ómirge erkindik sıpat berýge, ekonomıkany monopolııadan aryltýǵa bet burǵan saıasatqa qarsy top qańtar qyrǵynyn uıymdastyrǵanyn aıtty.
Prezıdent óz suhbatynda «Maǵan bas saýǵalap, rezıdenııadan ketý, tipti shetel asý týraly usynys birneshe ret aıtyldy. Biraq men buǵan úzildi-kesildi qarsy boldym. Eki apta boıy tapjylmaı, Aqordada boldym, kún-tún demeı, shuǵyl jınalystar ótkizdim. Sol alasapyran kúnderde memleketimizdi saqtap qalý, eldegi zań men tártip ústemdigin qalpyna keltirý eń basty mindet edi», - dep memlekettik tóńkeris jasaýdy oılaǵan qaskóı azamattardyń Prezıdentti elden ketýge úgittegenin aıtady. Shynyn aıtý kerek Prezıdentti kim úgittegeni bárimizge belgili. Ol týraly ashyq aıtylyp júr jáne ol adam tıisti jazasyn óteýde. Ujymdyq qaýipsizdik týraly shart uıymynyń bitimgerlik kúshteri Almaty qalasy men Almaty oblysyndaǵy lańkestik áreket jasalýy múmkin degen nysandardy qorǵaýǵa qatysty jáne jaǵdaı turaqtalǵanda óz elderine qaıtty.
Almatynyń qoǵamdyq-saıası ómirine aralasyp, onyń ishinde azamattardyń túrli narazylyq is-sharalaryna kýá bolǵan azamat retinde aıtarym beıbit sherý jappaı tártipsizdikke ulasqanyn, jaǵdaıdyń ýshyqqanyn sanasy bar azamattar túsindi. Ony shynymen burmalap, bassyzdyqty aqtaýǵa bolmaıdy. Tynyshtyqty oılaǵan, eldi búldirip almaýdy baǵamdaǵan azamattar jappaı tártipsizdikten qashty. Balalaryn qyzyq kórý úshin alańǵa alyp barmady. Dúrbeleń kezinde qarýly radıkaldar men lańkester bir mezette, bir ǵana buıryqpen memlekettik organdardyń jáne kúshtik qurylymdardyń ǵımarattaryna, qarý-jaraq dúkenderine, quqyq qorǵaý mekemeleri men áskerı bólimderdiń qoımalaryna shabýyl jasady. Jaǵdaı ýshyqqannan keıin ǵana quqyq qorǵaý organdary sońǵy sharaǵa barýǵa týra keldi. Bári zańdy. Adam quqyqtary qorǵalǵan, demokratııasy úlgi sanalatyn batys elderinde de bundaı tártipsizdikterge jol berilmeıdi. Prezıdentimiz árdaıym aıtatyn zań men tártip ústemdigi ornaǵan kezde ǵana elde ádilettilik ornaıdy.
Sondaı-aq, áleýmettik jeli betterinde qańtar oqıǵasyna tuńǵysh Prezıdentimizdiń qatysy bar jáne ol kisi de jaýapqa tartylý kerek degen pikirlerdi kórip qaldym. Qasym-Jomart Kemeluly óz suhbatynda osy daýǵa da núkte qoıdy, óz sózinde «Keıbir laýazymdy tulǵalardyń, onyń ishinde burynǵy Ádilet mınıstriniń mártebe jaǵynan Elbasy Prezıdentten joǵary turatynyn aıtqany esterińizde shyǵar. Keıbir sheneýnikter birese ana, birese myna kabınetti jaǵalap júrdi. Olar oınaqtap júrip, aqyry ot basty. Men keıinirek Nursultan Ábishuly Nazarbaevqa onyń jaqyn serikteriniń saıası qıturqylyǵy elimizdiń tas-talqanyn shyǵara jazdaǵanyn ashyq aıttym», - dep jazdy. Tuńǵysh Prezıdentimizdi qalqalap, qosarlanǵan bılik júıesin jaqtap, ózderiniń jymysqy oılaryn asyrýshy top bolǵanyn ashyq aıtty.
Prezıdentimizdiń suhbaty kóp suraqqa naqty jaýap berdi.
Elimizde zań men tártip ústemdigi ornasyn. Elimiz aman bolsyn, qańtar oqıǵasy sııaqty dúrbeleń bolmasyn.
Serikbolsyn Sarybaı
