Qasym-Jomart Toqaev “Egemen Qazaqstan gazetine bergen suhbatynda Nursultan Nazarbaevtyń bılik júıesindegi orny týraly pikirin aıtty, dep jazady “Adyrna” portaly.
“Bázbireýler qosarlanǵan bılik júıesin ornatýǵa talpynǵany, tipti, mundaı áreketterdi ádeıi ári muqııat uıymdastyrǵany ras. «Bılik tranzıti» kezindegi ahýaldy saıasattaǵy aılakerler óz múddesine paıdalanyp, qosamjarlanǵan bılik ortalyǵyn qurýǵa tyrysty. Elimizde Prezıdent ári Joǵarǵy Bas qolbasshy laýazymy bir bólek, burynǵy Prezıdent ıelengen Qaýipsizdik Keńesiniń Tóraǵasy laýazymy bir bólek boldy. Osy eki laýazymnyń ıeleri bir mezette qatar qyzmet atqardy. Túptiń túbinde bul jaǵdaıdyń bılikte qatań teketires týǵyzbaı qoımasy anyq edi” dedi prezıdent.
Ol osy “qosarlanǵan bılik júıesi” Qańtar oqıǵasynyń bolýyna da sebep bolǵanyn atap ótti.
“Muny az deseńiz, dál osy jaǵdaı Qańtar daǵdarysyna ákep soqtyrǵan alǵysharttyń biri boldy. Óıtkeni ymyralasqan qaskóıler ózderi oılap tapqan qosarlanǵan bılik, ıaǵnı «tandem» ıdeıasyn dáriptep, ony óz múddesine paıdalanǵysy keldi. Keıbir laýazymdy tulǵalardyń, onyń ishinde burynǵy Ádilet mınıstriniń mártebe jaǵynan Elbasy Prezıdentten joǵary turatynyn aıtqany esterińizde shyǵar. Keıbir sheneýnikter birese ana, birese myna kabınetti jaǵalap júrdi. Olar oınaqtap júrip, aqyry ot basty. Men keıinirek Nursultan Ábishuly Nazarbaevqa onyń jaqyn serikteriniń saıası qıturqylyǵy elimizdiń tas-talqanyn shyǵara jazdaǵanyn ashyq aıttym” dedi ol.
Sondaı-aq, ol halyq talqyǵa salǵan “úlken jáne kishi prezıdent” degen pikirge qarsy oıyn jetkizdi:
“Qalaı desek te, memlekette úlken jáne kishi prezıdent degen bolmaýy kerek dep sanaımyn. «Kettiń be – qaıyrylma!» Bolashaqta el tizginin ustaıtyn azamattar osy jaǵdaıdan sabaq alyp, mundaı nárseden qashyq bolýǵa jáne tek qana memlekettiń múddesi men qoǵamnyń bereke-birligin oılaýǵa tıis” dedi Qasym-Jomart Toqaev.
