Qazaqstanda 2020 jyldyń 1 qańtarynan bastap úsh jyl merzimge shaǵyn kásipkerlik sýbektilerine, onyń ishinde mıkro kásipkerlik sýbektilerine barýmen tekserýge, profılaktıkalyq baqylaýǵa jáne qadaǵalaýǵa jarııalanǵan moratorıı aıaqtaldy, dep habarlaıdy “Adyrna” ulttyq portaly QazAqparatqa siltep.
Dúısenbi kúni Prezıdent Qasym-Jomart Toqaevtyń 2020 jylǵy 1 qańtardan bastap kúshine engen «Qazaqstan Respýblıkasynda tekserýler men profılaktıkalyq baqylaý men qadaǵalaýǵa moratorıı engizý týraly» Jarlyǵynyń merzimi aıaqtaldy.
Bastapqyda moratorıı 2023 jylǵy qańtarda aıaqtalady dep josparlanǵan. Alaıda byltyr prezıdent onyń merzimin taǵy bir jylǵa uzartty.
Osylaısha shaǵyn bıznesti tekserýge moratorıı 2024 jylǵy 1 qańtardan bastap aıaqtaldy.
Bıyldan bastap bıznesti tekserýge adam qatyspaıdy. Óıtkeni elimizde táýekelderdi basqarý júıesi avtomattandyrylady. Nátıjesinde bıznesti josparly tekserý 2 ese jáne aıyppuldar sany birneshe ese azaıady dep kútilýde.
