Memlekettık keŋesşı Erlan Qarin äleumettık jelıdegı paraqşasynda jyldy qorytyndylap, biyl jüzege asqan saiasi reformalarǧa şolu jasady, dep habarlaidy «Adyrna» tılşısı.
Aituynşa, ötıp bara jatqan 2023 jyl elımız üşın tyŋ bastamalarǧa toly boldy.
«Biyl saiasi jüienıŋ jalpy kelbetın özgertken jäne jaŋa ekonomikalyq ülgınıŋ negızın qalaǧan reformalar jüzege asyryldy. Sondai-aq azamattardyŋ qoǧamdyq qūndylyqtar men normalardy qaita qarau, özgertu qajettıgın ūǧynuyna yqpal etken oqiǧalar boldy.
2023 jyldyŋ bırınşı jartyjyldyǧynda byltyr bastalǧan saiasi reformalar ıske asyryldy. Atap aitqanda, Konstitusiialyq Sot jūmysyn bastady (1 qaŋtardan bastap), Parlamentı Senatynyŋ sailauy öttı (14 qaŋtar), Mäjılıs pen barlyq deŋgeidegı mäslihat deputattary jaŋa ereje boiynşa sailandy (19 nauryz), Adam qūqyqtary jönındegı uäkıldıŋ märtebesı küşeitıldı.
Osylaişa, bırınşı jartyjyldyq saiasi jüienı institusionaldy tūrǧydan qaita qarau üşın qolǧa alynǧan kürdelı üderıstıŋ aiaqtaluymen qorytyndylandy»,—dedı ol.
Erlan Qarin 2023 jyldyŋ ekınşı jartyjyldyǧynda memlekettık saiasatta jalpyūlttyq qūndylyqtar jüiesın qaita qarauǧa basymdyq berılgenın atap öttı.
«Būl jūmys Prezident Qasym-Jomart Toqaevtyŋ Ūlttyq qūryltaidyŋ ekınşı otyrysynda, iaǧni Türkıstanda söilegen sözınen bastaldy (17 mausym). Osy alqaly jiynda Memleket basşysy ūltymyz üşın maŋyzdy mynadai negızgı ideologemalardy atap öttı: Täuelsızdık pen Otanşyldyq, Bırlık pen Tūraqtylyq, Ädıldık pen Tılektestık, Zaŋ men Tärtıp, Senım men Jauapkerşılık, Bılımpazdyq pen Käsıbilık, Ünemşıldık pen Eŋbekqorlyq. Keiın türlı oqiǧalar būl mäselenıŋ maŋyzdy ekenın körsettı. Qoǧamda zaŋ men tärtıptı saqtau, äielder men balalardyŋ qūqyqtaryn qorǧau, tūrmystyq zorlyq-zombylyqqa tosqauyl qoiu, vandalizm men jügensızdıkke qarsy küresu jäne basqa da mäseleler töŋıregınde qyzu pıkırtalas örbıdı. Mūnyŋ bärı jeke jäne qoǧamdyq mädeniettıŋ jaŋa normalaryn qalyptastyruǧa jäne ony saqtauǧa qalyŋ köpşılıktıŋ sūranysy arta tüskenın aŋǧartady. Bır sözben aitqanda, Qazaqstan ūlttyŋ jaŋa sapasyn qalyptastyruǧa kırıstı. Būl – jaŋa, asa kürdelı jäne öte maŋyzdy mındet. Saiasi reformalarǧa qaraǧanda, būl jerde zaŋnamany özgertu nemese jaŋa instituttar qūru jetkılıksız. Qoǧam sanasyn bır sätte özgertu mümkın emes. Būl – kezeŋ-kezeŋımen, bırtındep jüzege asyrylatyn tabiǧi üderıs. Jaŋa qoǧamdyq etika jaŋarǧan ūlttyq mentalitettıŋ negızı boluy üşın oǧan baǧyt-baǧdar berıp otyru kerek. Mıne, däl osy mäsele aldaǧy 2024 jyly qoǧam nazarynda boluy mümkın»,—dep sözın tolyqtyrdy Memlekettık keŋesşı.
