Almatyda 64 jastaǵy tanymal qazaqstandyq jáne keńestik sportshy Serik Nurqazov joǵalyp ketkeni habarlandy.
"Qoǵam" jedel áreket etý jasaǵynyń Instagram-daǵy paraqshasynda Almatyda tanymal sportshy Serik Nurqazovqa izdeý jarııalanǵany jaıly aqparat shyqty.
Er adam 14 jeltoqsanda úıinen belgisiz baǵytqa shyǵyp, qaıta oralmaǵan. Onyń basynda sur baskıim, ústinde kapıýshony bar kók kúrte, aq jempir, qara djınsy bolǵan. Sondaı-aq onyń shashy aq jáne saqaly bar ekeni aıtylǵan.
Aıta keteıik, Serik Tókenuly Nurqazov Qaraǵandy oblysynda dúnıege kelgen.
Ol bokstan KSRO eńbek sińirgen sport sheberi, 1983 jyly Rımde ótken Álem kýbogynyń kúmis júldegeri, 1981 jyly Tamperada ótken Eýropa chempıonatynyń qola júldegeri,1983 jyly Varnada ótken Eýropa chempıony jáne KSRO-nyń birneshe dúrkin chempıony.
