Bügın Astanada «Daryn» memlekettık jastar syilyǧynyŋ laureattaryn marapattau räsımı öttı dep habarlaidy «Adyrna» ūlttyq portaly.
Şaraǧa QR Mädeniet jäne aqparat ministrı Aida Balaeva, Parlament Mäjılısınıŋ deputattary, qoǧam qairatkerlerı men marapat ielerı qatysty. Ministr öz sözınde «Daryn» jastar üşın eŋ maŋyzdy syilyq ekenın atap öttı. «Ärine, öner-bılım – adamnyŋ talabynan tusa, onyŋ ışkı tälımı men mädenietı – tūlǧanyŋ ziialy sanasy men ūlttyŋ sapasynan. Sondyqtan da, el Prezidentı Qasym-Jomart Kemelūly Toqaev ziialy, intellektualdy ūlt turaly aitqanda, eŋ aldymen onyŋ negızın qūrauşy – özderıŋızdei önerlı de bılımpaz ǧana emes, tereŋ sanaly, ruhani sapaly jandar turaly aitady. Memleket basşysynyŋ soŋǧy jyldary jürgızıp jatqan auqymdy reformalary da osyndai jastarymyzdyŋ erteŋı üşın jasalyp jatyr. Bolaşaq Qazaqstannyŋ älemdık arenada şyn mänınde örkeniettı, ziialy da zaiyrly, ozyq oily boluynyŋ bırden-bır kepılı de osy. Onyŋ negızınde qarapaiym, bıraq öte maǧynaly bes talap jatyr: bılımdılık, eŋbekqorlyq, adaldyq, jauapkerşılık jäne käsıpqoilyq», - dep atap öttı Aida Balaeva qūttyqtau sözınde. Ministrdıŋ aituynşa, būl syilyq jüzdegen qazaqstandyq daryndy jastardyŋ ömırıne jaŋa bastama berdı. Olardyŋ qatarynda mädeniet qairatkerlerı Dimaş Qūdaibergen, «Muz ART» toby, sportşylar Olga Şişigina, Denis Ten, Dinara Saduaqasova, jas ǧylymdar Maksim Zdoroves, Maqsat Jabagin, jurnalister Maqpal Jūmabai, İrina Ten syndy daryndy tūlǧalar bar. «Būl qasietterdıŋ barlyǧy «Daryn» syilyǧynyŋ iegerlerıne tän qasietter ǧana emes, ösıp kele jatqan jastarǧa ülken önege. Bır ǧana Dimaş Qūdaibergennıŋ mysalynda Otanymyzdy, onyŋ mädenietı men tılın törtkül düniege paş etıp jürgen önerpazdy ǧana emes, ışkı parasaty zor, adami tälımı ülgı, jany meiırban azamatty köremız. Söz joq, būl jastarǧa dūrys baǧyt körsetetın önegelı jol. Sodan bolar – biyl «Daryn» syilyǧyna tapsyrys bergen jastardyŋ sany ötken jylǧa qaraǧanda 50% paiyzǧa köp. Qazylar alqasyna oŋai tigen joq. Qyzu talqylaular men pıkırtalastar boldy. Kıl jüirıktıŋ ışınen taŋdau jasau qaşanda qiyn, öitkenı barlyq ümıtkerler atalǧan syilyqqa laiyqty», - dedı Aida Balaeva.
Ministr jastardyŋ jarqyn ökılderı keler ūrpaqqa ülgı bola otyryp, adal eŋbek arqyly salauatty ömır saltyn nasihattauǧa, qoǧamdyq mädeniettı saqtauǧa, özın-özı damytu men ortada jaǧymdy, oŋ közqaras qalyptastyruǧa ūiytqy boluy tiıs dep sanaidy.
«Soŋǧy jyldary qolǧa alynǧan Prezidenttıŋ auqymdy reformalary, bastamalary men baǧdarlamalary bolaşaq ūrpaq üşın quatty ırgetas sanalady. Būl ıster erteŋgı qoǧam kedergılerge tap bolmauy üşın jäne jahandyq missiialarǧa nazar audarmauy üşın qajet. Memleket jastardyŋ damuy üşın barlyq jaǧdaidy jasaidy, al Prezident ärdaiym qoldai otyryp özın - özı jetıldıruge şaqyrady», - dep atap öttı ministr.
Ministr «Daryn» memlekettık jastar syilyǧynyŋ 19 laureatyna diplom, tösbelgı jäne aqşalai syilyqtar tabys ettı.
Biyl memlekettık organdar men qoǧamdyq bırlestıkter 340-tan asa kandidatura ūsyndy.
Onyŋ ışınde «ǧylym» boiynşa - 110, «Dizain jäne beineleu önerı» - 21, «Sport» - 27, «Teatr jäne kino» - 49, «Estrada» - 12, «Jurnalistika» - 10, «Halyq şyǧarmaşylyǧy» - 28, «Şyǧarmaşylyq bastamalar» - 32, «Ädebiet» - 28, «Klassikalyq muzyka» - 30 ötınım bar.
«Adyrna» ūlttyq portaly
Ūqsas jaŋalyqtar
