20 jeltoqsanda West Oil Software (WOS) kompanııasynyń jumysshylary "QazMunaıgaz" ókilderimen kelissóz júrgizýden bas tartty, dep málimdedi Mańǵystaý oblysy Qaraqııa aýdanynyń ákimi Symbat Tóretaev.
Tóretaev keshe West Oil software-diń narazy qyzmetkerlerimen kezdesken. Ákim narazy qaýymdy sabyrǵa shaqyryp, máseleni ústel basynda sheshýdi usynǵan. Jumysshylar ákim usynysyn qabyl alǵan.
20 jeltoqsan kúni tańerteń «QazMunaıGaz» AQ tóraǵasynyń orynbasary Dáýletjan Hasanov, «Mańǵystaý Munaı Gaz» basshysy Murat Mustafaev, West Oil software basshylyǵy men Qaraqııa aýdanynyń ákimi ereýil ótetin jerge kelip, ýaǵda boıynsha kelissóz proesin bastaýǵa shaqyrdy.
Alaıda, West Oil Software buǵan deıingi ýádeden aınyp, kelissózdi bastaýdan bas tartqan.
- Arnaıy komıssııa kelissóz júrgizýge daıyn. Bul jaǵdaıdy retteýdiń aqylǵy qonymdy joly, ony paıdalaný qajet, - dedi Dáýletjan Hasanov jınalǵandarǵa.
Alaıda, WOS qyzmetkerleri «QazMunaıGaz» shtatyna jumysqa ornalasýdy talap etip, kelissózden bas tartty.
WOS-tyń birqatar mamandarynyń jalaqyny «QazMunaıGazdaǵy» eńbekaqymen teńestirý, QMG enshiles kásipornynyń shtatyna kirý sııaqty qosymsha talaptary orynsyz ekenin eskerý qajet. Nege?
WOS-tyń keı qyzmetkerleri buryn "QazMunaıGazdyń" enshiles uıymdarynyń qyzmetkeri bolǵan jáne 2018 jyly 5/50 baǵdarlamasyn paıdalanyp, óz erkimen jumystan shyqqan ári atalǵan baǵdarlama aıasynda 5 jyldyq jalaqysynyń 50% alǵan. Ortasha alǵanda, bir adamǵa tólenetin tólem somasy shamamen 11 mln teńgeni qurady. Osy sebepti QazMunaıGazdyń ETU shtatyna kóshýi týraly talaptar da múmkin emes.
Ereýilge baılanysty "West Oil Software" JShS kúnine shamamen 23 mln teńge shyǵynǵa batýda.
Buǵan deıin, "West Oil Software" JShS qyzmetkerleri Toqaevtan, óńir basshysy Nurlan Noǵaevtan jumysshylardyń qýǵynyn toqtatýdy surap, vıdeoúndeý joldaǵan bolatyn.
