Qazaqstannyń burynǵy basshysy Nursultan Nazarbaev Máskeýge ushyp baryp, Kreml mańynda AQSh-tyń burynǵy prezıdenti Donald Tramp toqtaǵan Ritz-Carlton qonaqúıindegi dál sol páterlerge ornalasqan, dep habarlaıdy « Adyrna ulttyq portaly «Vzglıad na Vostok» telegram saıtyna silteme jasap.
«Býdanbaı – Qazaqstan jáne Ortalyq Azııa» telegram-arnasynyń avtory Anton Býdarovtyń aıtýynsha, Nazarbaev Reseı basshysy Vladımır Pýtınmen kezdesý josparlaǵan:
«Respýblıkadaǵy burynǵy yqpalynan aıyrylǵan Nazarbaev burynǵy oryndaryna qaıta oralý úshin Máskeýdiń qoldaýyna ıe bolǵysy keledi. Nursultan Nazarbaev ony Kremlde, eń bolmaǵanda, joǵary laýazymdy basshylar qabyldaıtynyna senimdi bolmasa, kelmes edi», - dep jazylǵan jazbada.
Nazarbaev sońǵy ýaqytta aıtarlyqtaı belsendilik tanytty. Aıta keterligi, «Meniń ómirim. Bodandyqtan bostandyqqa» kitabynda bútin bir taraýdy Pýtınge jáne onyń Reseı men Qazaqstan arasyndaǵy qarym-qatynastardy damytýdaǵy oń róline arnaǵan. Uzaq úzilisten keıin ol «Astana Club» pikirtalas alańyn jınap, onda álemdik saıasat týraly kóp aıtty. Degenmen onyń Reseı basshysymen kezdesýge múmkindigi joq ekenin jetkizdi TMD elderi ınstıtýty dırektorynyń orynbasary Vladımır Jarıhın:
«Nazarbaevtyń 2022 jylǵy qańtar oqıǵasyndaǵy róli barǵan saıyn aıqyn bola túsýde. Onyń Máskeýge jeke tulǵa retinde kelýine eshteńe kedergi bolmasa da, bolǵan oqıǵadan keıin resmı kezdesýlerge senýdiń qajeti joq. Vladımır Pýtın endi prezıdent Qasym-Jomart Toqaevpen sóıleskendi jón kóretin shyǵar»
Eske sala keteıik, eks-prezıdenttiń Táýelsizdik kúni Reseıde júrgenin habarlaǵan bolatynbyz.
«Adyrna» ulttyq portaly
