Qyrǵyzstan prezıdenti Sadyr Japarov Halyq quryltaıynyń delegattaryn týdy ózgertý bastamasyn qoldaýǵa shaqyrdy, dep habarlaıdy "Adyrna" ulttyq portaly.
Bishkekte memleket basshysynyń qatysýymen ótken eki kúnge sozylǵan ekinshi Halyq quryltaıy aıaqtaldy. Jumysty qorytyndylaǵan prezıdent memlekettik týdy ózgertý bastamasy ózine tıesili ekenin aıtty.
Degenmen memlekettik rámizdi ózgertý máseleni qaraý onyń quzyretine kirmeıtindikten, ol Jogorký Kenesh spıkeri Nurlanbek Shákıevke júginip, tý avtorlarymen talqylaý júrgizýdi suraǵan.
Sadyr Japarovtyń sózinshe, sheteldikter Qyrǵyzstan týynda beınelengen shańyraq pen kún sáýlelerin kúnbaǵyspen salystyryp, durys túsinbeýi sebep bolǵan.
Jumys sapary aıasynda men 30-ǵa jýyq elge bardym. Sheteldik delegattarmen kezdesýlerde menen tý týraly bes ret suralǵan shyǵar. "Olar sizdiń respýblıkańyzdyń basymdyǵy nede deıdi? Siz agrarlyq respýblıkasyz ba?" dep jıi suraıdy. Týdy ózgertýge úlken qarjylyq shyǵyndar talap etilmeıdi. Tólqujattar men kólik nómirlerin ózgertýdiń qajeti joq, olardyń jaramdylyq merzimi bitken saıyn birtindep aýystyrylady. Eń aldymen elshilikter men dıplomatııalyq ókildikterde, keıin mınıstrlikter men vedomstvolarda týlar aýystyrylady. Bul kóp aqshany qajet etpeıdi. Parlament spıkeriniń aıtýynsha, bul shyǵyndardy demeýshiler óteı alady. Bastapqy shyǵyndarǵa jeke qarajat bólýge daıynmyn. Búgin osy bastamany, ásirese jastardyń qoldaý kórsetýlerin suraımyn. Biz tolyq ózgertýdi usynbaımyz, tek týymyzdy jaqsartqymyz keledi, - dedi Sadyr Japarov.
Aıta keteıik, 29 qarashada parlament zań jobasyn birinshi oqylymda maquldaǵan bolatyn. 66 depýtat qoldaıtynyn aıtyp, oń daýys berse, al 8 -i qarsy.
Bul ózgeriske qatysty eldiń UQK tóraǵasy Qamshybek Táshıev te óz pikirin aıtqan:
"Tý kúnbaǵysqa uqsamaýy kerek, biraq jarqyraǵan kúnniń beınesin berýi kerek", - dedi.
Qyrǵyzstanda týdy ózgertý týraly pikirtalastar áli kúnge deıin jalǵasyp jatyr. Áleýmettik jelilerde #týózgermesin heshtegimen túrli jazbalar, fleshmob uıymmdastyrylýda.
