Búgin Jambyl oblysyna Qazaqstan Respýblıkasy Premer-Mınıstriniń orynbasary Gúlshara Ábdiqalyqova jumys saparymen keldi. Bul týraly “ZhambylNews” AA oblys ákiminiń baspasóz qyzmetine silteme jasap habarlaıdy.
Vıe-Premer aldymen aımaqtaǵy áleýmettik az qamtylǵan otbasylardyń shańyraǵyna at basyn burdy. Atap aıtar bolsaq, tarazdyq kóp balaly ana Uldana Qozıeva joldasy ekeýi 6 bala tárbıelep otyr. Úlken uldary 2003 jyly týǵan, Jambyl polıtehnıkalyq kolledjiniń 1-kýrs stýdenti. Al úsh balasy mektep oqýshylary desek, ekeýi balabaqsha tárbıelenýshileri. «Altyn alqa» ıegeri Uldana Berikqyzy bala tárbıesimen úıde bolsa, joldasy kúzetshi qyzmetinde. Jalaqysy – 43 myń teńge.
Bul otbasynyń balalary mektepte ystyq tamaq jáne qystyq kıimdermen qamtylǵan. Buǵan deıin otbasynyń aılyq jıyntyq tabysy 75919 teńgeni qurasa, birinshi sáýirden bastap ol 231481 teńgeni quramaq. Oǵan memlekettik ataýly áleýmettik kómek júıesindegi oń ózgerister sebep bolyp otyr.
Sondaı-aq, Gúlshara Naýshaqyzy Tarazdyq kópbalaly ana Aınur Naýatovanyń jáne kómekke muqtaj Zýhra Karımovanyń shańyraqtarynda bolyp, jaǵdaılarymen tanysty. G. Ábdiqalyqova muqtaj jandarǵa qandaı kómek qajet ekenin bilip, tilek-nıetteri nazarǵa alynatynyn jetkizdi.
Aıta keteıik, Jambyl oblysynda 1 sáýirden bastap ataýly áleýmettik kómekti 29650 otbasy alýda. Jan basyna shaqqandaǵy tabysy kedeılik sheginen tómen 29650 otbasynyń áleýmettik kartasy túzilip, onda barlyǵy 150400 adam qamtylǵan.
QR Premer-mınıstri orynbasarynyń aımaqtaǵy sapary halyqqa qyzmet kórsetý ortalyǵynda jalǵasty. Ortalyq jumysymen jan-jaqty tanysqan Gúlshara Naýshaqyzy áleýmettik álsiz top ókilderin jumyspen qamtý deńgeıin nazarda ustaýdy tapsyrdy.
Aıta keterligi, bir qabattan turatyn halyqqa qyzmet kórsetý ortalyǵy 2006 jylǵy 11 qarashada paıdalanýǵa berilgen. Jalpy aýmaǵy 805,9 sharshy metrdi quraıdy. Barlyq qajetti tehnıkalyq qural-jabdyqtarmen qamtamasyz etilgen ortalyq 2018 jyly 91 100 turqynǵa qyzmet kórsetken. Al aǵymdaǵy jyldyń I toqsanynda 20 700 adam ortalyq arqyly memlekettik kórsetiletin qyzmetke júgingen. Ortalyqta 89 qyzmetker jumys jasasa, barlyǵy 621 qyzmet túri kórsetiledi.
Kelesi kezekte Vıe-Premer Taraz qalalyq halyqty jumyspen qamtý ortalyǵyna at basyn burdy. Ortalyq ǵımaratynyń jalpy aýmaǵy 1246,7 sharshy metrdi quraıdy. Munda ótken jyly 12375 adamǵa qyzmet kórsetilgen. Nysan barlyq qajetti tehnıkamen jabdyqtalǵan. Mekemede 52 adam qyzmet etedi.
Qazaqstan Respýblıkasy Premer-Mınıstriniń orynbasary Gúlshara Ábdiqalyqovanyń aımaqtaǵy jumys sapary erteń de jalǵasyn tabatyn bolady.
