Jańaózende astyrtyn oıyn mekemesi anyqtaldy, dep habarlaıdy “Adyrna” portaly Qarjy monıtorıngi agenttiginiń (QMA) baspasóz qyzmetine siltep.
«Jańaózen qalasynda zańsyz oıyn bıznesimen aınalysatyn uıymdasqan qylmystyq top anyqtaldy. Qatysýshylar mekemeniń turaqty jumys isteýi úshin oıyn bıznesine arnalǵan kompıýterler balansyn júıeli túrde tolyqtyryp, nysannyń qaýipsizdigin qamtamasyz etip, zańsyz paıda jınap, basqa da uıymdastyrý-basqarý qyzmetterin atqarǵan», - delingen sársenbide taraǵan habarlamada.
Tintý kezinde oıyn oınaýǵa arnalǵan qurylǵylar: júıelik bloktar, monıtorlar, chek prınterleri, chek skanerleri, teledıdarlar, telefondar jáne qolma-qol aqsha tárkilendi.
«Zańsyz áreketterden túsken qylmystyq kiris kólemi 77 mıllıon teńgeden asty», - dep túsindirdi QMA.
