Qyzylorda oblysy ákimi Nurlybek Nálibaev jýyrda jańa úılerdiń kiltin tabys etý kezinde bolǵan jaıǵa túsinik berdi. Ákimniń sondaǵy áreketi áleýmettik jelide qyzý talqylanǵan. Búgin Ortalyq kommýnıkaııalar ortalyǵynda ótken baspasóz alańynda osy suraq oblys basshysyna qoıyldy.
Ákimniń aıtýynsha, bul oqıǵa Aral aýdanynda bolǵan. Sondaı-aq ol vıdeo taratqan adamdarǵa ókpeli ekenin eskertti.
- Aral aýdanynda biz 100 otbasyǵa páter kiltin tabystadyq. Sizdiń aıtyp otyrǵanyńyz sol úıdi tabystaý kezindegi jaǵdaı. Shynyn aıtqanda, ol jerde keleńsiz oqıǵa oryn alǵan joq. Baspasóz hatshym bul týraly keshe baıandady, endi ony shyǵarǵan adamnyń óziniń ary biledi. Baspasózq yzmetkerimniń aıtýynsha, abyroıyn, reıtıngin kóterý úshin osy vıdeony montajdap shyǵarǵan. Jyldamdyǵyn kóbeıtip, basy, aıaǵyn alyp tastap, áserlep bergen. Ózine qajetti ári halyqqa ótetin jaǵyn kórsetken. Baspasóz hatshym keıin olar óz qatelikterin moıyndap, keshirim surap, ózderiniń jazbalaryn jarııalady dedi. Ony ózderińiz de kórseńizder de bolady. Men olardyń kim ekenin bilmeımin. Bizdiń resmı paraqshamyzdan ol sharanyń qalaı ótkenin bilgińiz kelse, vıdeonyń túpnusqasy tur. Biz qazir aýdandarǵa barǵan kezde burynǵydaı júgirip lenta qımaımyz. Sol eldiń úlkenderi men ardagerlerine lenta qıdyryp, batasyn alamyz. Kilt bergen kezde bireýin tapsyramyz da qalǵanyn ardager aǵalarymyz tapsyrsyn deımiz. Vıdeony kórseńizder, qaryndasyma «kiltti ardagerge aparyp ber» dep aıtyp jatyrmyn, biraq ol ony estimeı, túsinbeıdi. Kún salqyn. Ekinshi kilt alatyn adam kezekte tur. Almaǵan soń, aldym da berdim men. Onda turǵan ne bar? Turǵyn úı alyp jatqan adammen sýretke tústim. Kilt alatyn kezekte adamdar bolǵan soń «Bara berińiz» dep aıttym. Áriptester, ókinishke oraı, bárimiz bolmasaq ta, keıbirimiz óziniń reıtıngin kóterip, abyroıyn kóterý úshin tyrnaq astynan kir izdeıtin adamdar bar. Bul óte durys emes dep esepteımin. Syn aıtylý kerek, biz ony qabyldaımyz. Odan qorytyndy shyǵaramyz. Biraq ol, ótinish, shynaıy bolsa. Bizde osyndaı synı materıal shyqsa, bárimiz joq jerden izdep taýyp alamyz. Al erteń biz ony teristep bersek te, tipti eshkim de qaraımaıdy. Ómir bolǵannan keıin bizge de jaqtas adamdar bar ǵoı. Solar «men shyndyqty aıtyp pikir jazsam, óshirip tastaıdy» dep aıtady. Bul durys emes qoı. Bári shynaıy bolý kerek», – dedi ol.
Baspasóz máslıhatynda moderator «Nurlybek myrza, raqmet» dep ákimdi toqtatýǵa májbúr boldy.
Serik Joldasbaı
«Adyrna» ulttyq portaly
