Bala quqyqtary jónindegi ýákil Dınara Zákıeva ashyq káriz qudyqtarynda bala ólimi jıilegenin aıtyp, búl úshin sheneýnikterdi jaýapqa tartýdy usyndy, dep habarlaıdy “Adyrna” ulttyq portaly.
«Infraqurylymnyń qaýipsizdigin qamtamasyz etpegen jáne balalardyń ólimine ákep soqtyrýyna jol bergen kináli laýazymdy tulǵalardy tekserip, jaýapkershilikke tartý qajet dep sanaımyn. Máselege jergilikti atqarýshy organdardyń basshylaryn da, aýdan ákimderi jaýapqa tartý qajet degen oıdamyn», - dep jazdy ombýdsmen jelide.
Sońǵy eki aptada Qyzylorda men Túrkistan oblysynda 2 bala káriz qudyǵyna túsip qaza boldy. Eki jaǵdaıda da qudyq ákimdikke tıesili bolǵan.
