Ǵylym jáne joǵary bilim mınıstri Saıasat Nurbek «Almaty Hostel»-degi órtke qatysty pikir bildirdi, dep habarlaıdy “Adyrna” ulttyq portaly.
Mınıstrdiń aıtýynsha, Ýnıversıtetter jalǵa alǵan hostelderde órt qaýipsizdigi saqtalǵan.
«Osy apatta 2 stýdentimizden aıyrylyp qaldyq. Olardyń biri Kaspıı qoǵamdyq ýnıversıtetinde bilim alsa, ekinshisi Eýrazııa tehnologııalyq ýnıversıtetiniń stýdenti. Apattyń sebebi men saldary muqııat tekserilý ústinde jáne osyǵan baılanysty tıisti sharalar qabyldanatyn bolady. Tamyz aıynda meniń buıryǵymmen JOO rektorlaryna stýdentterdi hostelderge ornalastyrý týraly tapsyrma berilgen bolatyn. Hostelderde stýdentterden ózge eshkimniń turmaýyn biz erekshe nazarǵa aldyq jáne de hostelderde quzyrly oryndamen birlesip, sanıtarlyq-tazalyq jumystary men órtke qarsy tehnıkalyq qaýipsizdikti kúsheıttik. Búgingi kúnge deıin ýnıversıtettermen kelisimshart ornatqan hostelderde eshqandaı keleńsiz jaǵdaılar bolmaǵanyn jetkizgim keledi», - dedi mınıstr.
Almaty qalasynyń joǵary oqý oryndary atalǵan hostelmen stýdentterdi ornalastyrýǵa kelisimshart jasaspaǵan. Búgingi tańda JOO-lar 87 nysandy (qonaqúıler men hostelder) jalǵa alǵan.
