Qazaqstanda memlekettik bıýdjettiń 80 paıyzy ornyqty damý maqsattaryna sáıkestendirildi. Bul týraly Qasym-Jomart Toqaev BUU-nyń Ortalyq Azııa ekonomıkalaryna arnalǵan Arnaıy baǵdarlamasyna (SPEKA) qatysýshy memleket basshylarynyń birinshi sammıtinde aıtty, dep habarlaıdy «Adyrna» tilshisi.
«Geosaıası turǵyda bólshektený beleń alyp, jahandyq ekonomıkanyń konıýnktýrasy qubylyp turǵan qazirgi jaǵdaıda Arnaıy baǵdarlamanyń mán-mańyzy arta túsedi. Ortaq múddeni eskere otyryp, SPEKA-ny odan ári damytý jóninde óz kózqarasymdy ortaǵa salýǵa ruqsat etińizder.
Ornyqty damý qaǵıdattary memleketterimizdiń ulttyq strategııalary men baǵdarlamalarynyń ózegine aınaldy.
Búginde Qazaqstanda memlekettik bıýdjettiń 80 paıyzy ornyqty damý maqsattaryna sáıkestendirildi»,—dedi ol.
Prezıdent el úkimetiniń basty mindetin de atap ótti.
«Úkimetimizdiń eń basty mindeti – sapaly bilim berý men densaýlyq saqtaý isiniń barshaǵa qol jetimdi bolýyn qamtamasyz etý. Jýyrda kúshine engen jańa Áleýmettik kodekste áleýmettik osal toptarǵa jatatyn azamattardy qorǵaý tetikteri jetildirildi»,—dep tolyqtyrdy Toqaev.
