Memleket basşysy Qasym-Jomart Toqaev ŪQŞŪ Ūjymdyq qauıpsızdık keŋesınıŋ şaǧyn qūramda ötken sessiiasynda konstruktivtı müdde jaily aitty. Būl turaly Aqordanyŋ baspasöz qyzmetı mälımdedı, dep habarlaidy “Adyrna” ūlttyq portaly.
Qasym-Jomart Toqaev öz sözınde bügıngı sessiia halyqaralyq ahual kürt naşarlaǧan öte qiyn jaǧdaida ötıp jatqanyna nazar audardy. Euraziia qūrlyǧyndaǧy jäne ŪQŞŪ jauapkerşılıgıne kıretın aimaq töŋıregınde kürdelı jaǧdai qalyptasyp otyr. Memleket basşysynyŋ pıkırınşe, Taiau Şyǧystaǧy oqiǧalardyŋ aujaiy da erekşe alaŋdauşylyq tuǧyzady.
«Qaqtyǧystan beibıt halyq zardap şegıp otyr. Qanşama jazyqsyz adam, balalar qaza tapty. Mūndaiǧa bei-jai qarau mümkın emes. Qazaqstan Gaza tūrǧyndaryna bır million dollar kölemınde gumanitarlyq kömek körsettı. Qarjy BŪŪ qūrylymy – UNRWA/BAPOR ūiymy arqyly jıberıldı. Qaqtyǧys kezınde būl ūiymnyŋ qyzmetkerlerı öte köp şyǧynǧa ūşyraǧanyna qaramastan, jūmysyn erlıkpen jalǧastyryp jatyr. Taiau Şyǧystaǧy qaqtyǧys, şyn mänınde, jahandyq auqymdaǧy aqparattyq-ideologiialyq teketırestı äbden şiryqtyryp jıberdı. Gaza sektory töŋıregınde bolyp jatqan oqiǧalar älemdık qoǧamdastyqty ekıge jardy. Soǧys örtı barlyq el men kontinenttı şarpymai tūrǧanda toqtaǧany jön», – dedı Prezident.
Memleket basşysy Qazaqstannyŋ uaqytşa bıtım jasau turaly soŋǧy kelısımdı qūptaitynyn mälımdedı.
«Bız äuel bastan qaqtyǧysuşy taraptardyŋ gumanitarlyq üzılıs jariialauy kerek ekenın aittyq. Olar osy uaqytty qalyptasqan jaǧdaidy retteudıŋ ūzaqmerzımdı şaralaryn äzırleuge paidalanu üşın bar küş-jıgerın jūmsauy qajet. Būǧan qosa, BŪŪ aiasynda palestinalyqtarǧa «Ekı halyq üşın ekı memleket» formulasyna sai tolyqqandy memleket qūru qūqyǧyn bergen jön. Osyndai qiyn jaǧdaida BŪŪ Qauıpsızdık Keŋesınıŋ qararyn mültıksız oryndap, halyqaralyq qūqyq normalaryn saqtau maŋyzdy», – dedı Qasym-Jomart Toqaev.
Sonymen qatar Qazaqstan Prezidentı Auǧanstandaǧy kürdelı ahualǧa nazar audaryp, halyqaralyq qoǧamdastyqty auǧan halqyna kömek beru ısın jalǧastyruǧa şaqyrdy.
«Auǧan halqyna gumanitarlyq kömek körsetudı jalǧastyru jäne tauqymetı köp osy eldıŋ öŋırlık ekonomikaǧa integrasiialanuyna yqpal etu maŋyzdy dep sanaimyz. Biyl Qazaqstan Auǧanstanǧa azyq-tülık, asa qajettı tauarlar men därı-därmek jönelttı. Qazan aiynda Auǧanstannyŋ batysynda bolǧan jer sılkınısıne bailanysty kömek körsetıldı. Gerat qalasyna qūtqaruşylar, kinologtar men medisina qyzmetkerlerı jıberıldı»,– dedı Memleket basşysy.
Qasym-Jomart Toqaev ŪQŞŪ aiasyndaǧy serıktesterdıŋ ädettegı qauıp-qater deŋgeiınıŋ ūlǧaiuyna, sonyŋ ışınde esırtkı, qaru-jaraq ainalymynyŋ, transşekaralyq qylmys pen zaŋsyz migrasiianyŋ ösuıne qatysty alaŋdauşylyǧyna tüsınıstıkpen qaraitynyn mälımdedı. Qazaqstan Ūiymǧa müşe memlekettermen bırge osy syn-qaterlerge aldaǧy uaqytta da tötep beruge äzır.
«Bız ŪQŞŪ qyzmetınıŋ ädıs-täsılı men strategiiasyn jolǧa qoia otyryp, zamanaui qauıp-qater men syn-tegeurınderdı mındettı türde eskeruge tiıspız. Sonymen qatar ŪQŞŪ-ǧa müşe memleketterdıŋ qauıpsızdıgıne qater tönıp kele jatqanyn, eger ondai qauıp bolsa da, ony ünemı aita berudıŋ qajetı joq dep oilaimyn. Tüptep kelgende, qauıp-qater ärdaiym bolǧan. Halyqaralyq qoǧamdastyqtyŋ bolmysy osyndai. Būl taqyrypty qaita-qaita köteru, bızdı äldekımnen qorqatyndai körınıs qalyptastyrady. Mūndai mälımdemeler mülde qate tüsınıkke alyp keluı mümkın, tıptı qazırdıŋ özınde solai bolyp körınedı. Qatysuşy memleketterdıŋ abyroi-bedelın jäne olardyŋ äskeri-saiasi äleuetı men quatyn eskere otyryp, Ūiymnyŋ ritorikasy qatal, äitse de belgılı bır deŋgeide qisyndy boluǧa tiıs. ŪQŞŪ bedeldı äskeri-saiasi ūiym retınde özınıŋ jetıstıkterın paş ettı. Bıraq aldymyzda ūiymǧa müşe memleketterdıŋ konstruktivtı müddesıne sai keluge tiıs jaŋa mındetter tūr», – dedı Qazaqstan Prezidentı.
Sonymen qatar Qasym-Jomart Toqaev Ūiymnyŋ äleuetın damytu jäne syn-qater men qauıpke qarsy ıs-qimyl tetıkterınıŋ tiımdılıgın arttyru üşın bır jyl ışınde auqymdy jūmys atqarylǧanyn atap öttı. Prezident 2024 jyldyŋ 1 qaŋtarynan bastap Qazaqstan Ūiymǧa töraǧalyq etetının jäne osy kezeŋde basymdyq berıletın baǧyttardy keŋeitılgen qūramdaǧy jiyn barysynda jetkızetının aitty.
Qasym-Jomart Toqaev elımızdıŋ Ūiymdy qarqyndy ärı teŋgerımdı damytuǧa, barlyq müşe memlekettıŋ ūlttyq müddelerın eskere otyryp, ūjymdyq qauıpsızdıktı nyǧaituǧa niettı ekenın mälımdedı.
Aita keteiık, jiynǧa Belarus Respublikasynyŋ Prezidentı Aleksandr Lukaşenko, Qyrǧyz Respublikasynyŋ Prezidentı Sadyr Japarov, Resei Federasiiasynyŋ Prezidentı Vladimir Putin, Täjıkstan Respublikasynyŋ Prezidentı Emomali Rahmon, sondai-aq ŪQŞŪ Bas hatşysy İmanǧali Tasmaǧambetov qatysty.
