Qazaqstannyń «otty núktelerge» ásker jiberýi ne beredi? Qorǵanys mınıstriniń Taıaý Shyǵysqa bitimgershilik kúshterin jiberýdi qarastyrýy neni bildiredi?
Qazaqstan áskerıleri bitimgershilik mıssııasymen Taıaý Shyǵysqa, Golan jotalaryna barýy múmkin. Bul týraly ótken aptada Qorǵanys mınıstri Rýslan Jaqsylyqov Májilis otyrysynda málim etti. Izraıl men Hamas toby arasynda arasynda soǵys bolyp jatqan aımaqqa bitimgershilik kúshterin jiberý qanshalyqty durys? Áskerı sarapshy men depýtattan surastyrdyq.
MINISTR NE DEIDI?
«Bizde kelisimder bar, Qazaqstan Qarýly Kúshteri men memleketimiz júrgizip otyrǵan saıasattyń arqasynda bizde belgili bir quzyret bar. Al qazir Golan jotalaryna bitimgershilik mıssııasyn ótkizý máselesin qarastyryp jatyrmyz», - dedi mınıstr. Alaıda bul tek talqy kúıinde qalýy múmkin.
Mınıstr qazaqstandyq bitimgerlerdiń naqty urys alańyna jiberý máselesi jaıly talqy joqtyǵyn aıtty. «Ázirge basqa suraqtar talqylanyp jatqan joq. Bizden Gaza sektoryna qatysty qandaı da bir kómek suraǵan joq», - deıdi ol.
Mınıstr Jaqsylyqov Qazaqstannyń bitimgershilik mıssııalary tek BUU aıasynda iske asatynyn, qajet bolǵan jaǵdaıda Qazaqstan Uıymǵa qajet bolǵan aımaqqa óziniń bitimgershilik kúshterin jiberýge daıyn ekenin aıtty.
«ÁSKERI TÁJIRIBE JINAIMYZ»
Áskerı sarapshy Ermek Seıitbattalovtyń aıtýynsha, áskerı bitimgershilik jiberý qarýly kúshterimizge tájirıbe jınaýǵa múmkindik beredi. Alaıda ol eki jaq ortaq mámilege kelip, soǵys toqtamaıynsha bitimgershilik jiberýge bolmaıdy degen pikirde.
– Áskerı bitimgerlik mıssııasyn jiberý Parlamentte qaralǵan joq. Múmkin prezıdent Qorǵanys mınıstrine aıtqan shyǵar, alaıda mınıstr ol aqparatty BAQ-na erterek jarııalap qoıdy. Bálkim, Qazaqstan qarýly kúshteri bul máseleden tys qalmaımyz dep daıyndalyp jatqan shyǵar. Onyń ústine áskerı bitimgershilik BUU-nyń sheshimi arqyly iske asady. Sondaı-aq Qazaqstan jeke óz aldyna jeke ásker almaıdy. Biz koordınator memleketpen birge baramyz. Mysaly, Irakqa barǵanda Ýkraına Qarýly kúshteriniń qanatynda boldyq. Al Lıvanǵa barǵanda Indonezııanyń koordınatorlyǵynda boldyq. Ázirshe jeke ózimizdiń barýymyzǵa múmkindigimiz joq, - dedi ol.
Ermek Seıitbattalov áskerı adam árdaıym qaýip-qaterde júretinin aıtady. Áıtse de ol áskerimizdiń mundaı jerlerge baryp, bitimgershilik jasaǵany óte mańyzdy ekenin eskertti.
– 2003 jyly Irakta qatelespesem - 240, Lıvanda 400 áskerı azamatymyz bitimgershilik quramynda boldy. Sondaı-aq birneshe Afrıka eline baryp, jaqsy tájirıbe jınady. Jalpy elimiz áskerı bitimgershilik jiberýdi halyqaralyq arenada oń ımıdj jınaý úshin paıdalanady. Áıtse de bitimgershilik jasaǵan áskerılerdiń tájirıbesin ózge azamattarǵa úıretý jaǵy aqsap jatady. Ashyǵyn aıtsaq bitimgershilikke barǵannan keıin eshkimge kerek bolmaı qalady. Áıtpese bizdiń áskerıler BUU tarapynan ozat bolyp, aıryqsha marapat aldy, – deıdi ol.
«IMIDJDI OILAITYN KEZ EMES»
Al Májilis depýtaty Abzal Quspan qazaq áskeriniń bitimgershilikpen Golan jotalaryna barýǵa qarsy. Sebebi ol eń áýeli ózimizdiń terrıtorııalyq tutastyǵymyzǵa mán berý kerek degen pikirde.
– Ótken sessııada qabyldaǵan zań jobasyna sáıkes, shet elge qandaı da bolmasyn áskerı kómek jiberý – Májilis pen Senat depýtattarynyń basym kópshiliginiń daýysymen qabyldanatyn sheshim. Eger depýtattar mundaı bastamaǵa qarsy bolatyn bolsa, onda Úkimettiń bastamasy iske aspaıtyn bolady. Ókinishke qaraı mundaı «ystyq núkte» álemniń bir emes, birneshe jerinde bolyp, ot tutanyp jatqan jaıy bar. Bulardyń qaısibár jaǵyna jaqtasyp, ne bolmasa bitimgerlik maqsatta Qazaqstan tarapy barýǵa daıyn emes dep bilemin. Ázirge erte. Sebebi ózimizde de problema jetip artylady. Soǵys qımyldarynsyz-aq azamattarymyzdan aıyrylyp jatqan jaıymyz bar. Sońǵy kezderdegi oqıǵalardy eske alatyn bolsaq, Qazaqstan bitimgerlik kúshterin jiberýge daıyn emes. Dál qazirgi jaǵdaıda halyqaralyq ımıdjimizdi oılaıtyn jaǵdaıda emespiz. Sońǵy 2-3 jyldyń kóleminde bir emes, úsh jerde soǵys órti tutanyp, ekeýinde áli soǵys júrip jatyr. Mundaı jaǵdaıda ımıdjdi oılaý kerek pe, joq álde terrorııalyq tutastyǵymyzdy jáne ony qamtamasyz etetin azamattardyń amandyǵyn kóbirek oılaǵan jón be?! – dedi depýtat.
«Qazaqstan bitim batalony» 2000 jyly quryldy. 2003 jyldyń tamyz aıynda 27 adamnan turatyn Qazbattyń alǵashqy ınjenerlik-saperlik otrıady Irakqa attandy. Al 2014 jyldan beri 60-qa jýyq áskerı qyzmetker, onyń ishinde alty áıel BUU-nyń Kot-d'Ivýardaǵy, Batys Saharadaǵy, Lıvandaǵy, Ortalyq Afrıka Respýblıkasy men Malıdegi mıssııalaryna shtab ofıeri jáne áskerı baqylaýshy retinde qatysty. 2018 jyly BUU mandaty boıynsha jumys isteıtin alǵashqy otandyq rota Lıvanǵa jiberildi.
Serik Joldasbaı,
«Adyrna» ulttyq portaly
