Qazaqstan Palestına halqyna 1 mıllıon dollar kóleminde kómek beredi. Bul týraly Memleket basshysy Qasym-Jomart Toqaev Túrki memleketteri uıymynyń 10-sammıtinde aıtty, dep habarlaıdy «Adyrna» tilshisi.
Prezıdent qazir aınalamyzda kúrdeli ahýal qalyptasyp otyrǵanyn atap ótti.
«Soltústikte Reseı men Ýkraına, Taıaý Shyǵysta Izraıl men Palestına arasynda qandy qaqtyǵys bolyp jatyr. Aýǵanstannyń jaǵdaıy da turaqsyz. Batysta zańsyz kóshi-qon máselesi ýshyǵyp tur. Búginde Gaza Sektoryndaǵy beıbit turǵyndar, ásirese, balalar jáne qarttar janjal azabyn shegýde. Olardyń qaýipsizdigin qamtamasyz etý – basty mindet. Osy oraıda, Qazaqstannan Palestına halqyna 1 mıllıon dollar kóleminde gýmanıtarlyq kómek berý týraly sheshim qabyldadym»,—dedi ol.
Memleket basshysynyń pikirinshe, ondaǵan jyl boıy sheshimin tappaǵan ózekti máselelerdi zorlyq-zombylyq kórsetý jáne lańkestik ádister arqyly sheshý múldem durys emes.
«Qazaqstan mundaı tásilderdi qatań aıyptaıdy. Ahýal ýshyǵyp ketse, onyń saldary tipti aýyr bolýy múmkin. Bul rette kez-kelgen janjaldy beıbit kelis-sóz jáne dıplomatııalyq dıalog arqyly ǵana sheshýge shaqyramyz. Biz úshin ár eldiń aýmaqtyq tutastyǵyn saqtaý jáne onyń ishki isine qol suqpaý – basty basymdyq. Halyqaralyq quqyq normalaryn saqtaı otyryp, Birikken Ulttar Uıymy Qaýipsizdik Keńesiniń qararlaryn múltiksiz oryndaý mańyzdy»,—dep tolyqtyrdy Qasym-Jomart Toqaev.
Budan aldyn Ózbekstan prezıdenti Shavkat Mırzııoev Palestına elin ashyq túrde qoldaıtynyn málimdep, Gaza sektoryna gýmanıtarlyq kómek retinde 1,5 mln dollar qarjy bólýge sheshim qabyldaǵanyn jarııalaǵan.
