Sońǵy jyldary ǵylym salasy tyń serpilis alǵany aıtylyp ta, baıqalyp ta júr. Saǵat saıyn bolmasa da, kún saıyn qaısybir óńirde birdeńe oılap taýypty degendi jıi estıtin boldyq. Munyń ózi alǵa umtylystyń belgisi bolar. Áıtpese, ilgerileý joq jerde, keri ketý bolatyny anyq qoı. Endi sol sońǵy jyldyqta elimizdiń ǵylym salasy ne bitiripti tizbelep kórelik.
Alǵashqysy, qazaqsha ym-ısharany túsinetin jasandy ıntellekt. Buǵan deıin ondaıdy estidińiz be? Árıne, joq. Bul biregeı júıe kórinedi. Muny L.Gýmılev atyndaǵy EUÝ jasandy ıntellekt tehnologııasy kafedrasynyń aǵa oqytýshysy Nurzada Amangeldi oılap taýypty. Bul júıeniń artyqshylyǵy onyń qazaq tilin tanı alýynda. Jasandy ıntellekt sóıleýinde qıyndyqtary bar jáne estý qabileti nasharlaǵan jandarǵa taptyrmas kómekshi bola alar edi. Júıe ym-ısharany mátinge túrlendirip beredi eken. Teńdesi joq jobany jasaýshy onyń álemde biregeıligin dáleldep úlgeripti. Ol bul júıe erekshe qajettiligi bar jandardyń qoǵamdyq oryndarda erkin júrip-turýyna, mekemelerge ońaı kirýine kómektesedi deıdi.Nurzada Amangeldiniń júıege 9 myń sóz engizbeknıeti bar. Al sol sózderdi ár adamnyń ym-ısharasynda 100 ret jasap kórmek. Sonda jalpy 90 myń bolady. Ónertapqysh alda aýqymdy jumys kútip turǵanyn aıtady. Rasynda, mundaı júıeler qoǵamǵa qajet dúnıe. Statıstıkaǵa súıensek, elimizde 32 myńǵa jýyq adamnyń estý qabiletinde kinárat bar. Bul olardyń ózderi qatarly adamdarmen eńbek etip, qarym-qatynas jasaýyna kedergi keltiredi. Sondyqtan bul jobanyń mańyzdylyǵy ýaqyt ótken saıyn artyp barady.
Al ekinshisin, Abaı oblysynyń mektep oqýshysy Beknur Aıdarbek jasap shyǵypty. Ol bul eńbegin qoı sharýashylyǵyn damytýǵa arnaǵan. Iaǵnı, qoıdyń tólin jasandy kóbeıtý, qoı sharýashylyǵynda zamanaýı jabdyqtardy paıdalaný, az shyǵyn, joǵary sapa arqyly jumys isteý t.b. Belgilisi, avtomattandyrylǵan júıe qoıshylardyń aýyryn jeńil etetini anyq. Júıe qoıdyń jep-shóbinen bastap, sýyna deıin ózi beredi. Júıeni telefon arqyly basqarýǵa bolady. Tek qoılaryńyz 2 gektar qorshalǵan aýmaqta jaıylýy tıis. Bul keıipkerimiz de jobanyń tıimdiligin dáleldegen. Kishkentaı Beknur júıe ákem men atamnyń jumysyn biraz jeńildeter edi degen nıette.
