Ershat Qaıboldın. MEN QYZ IZDEIMIN...

15884
Adyrna.kz Telegram

 

MEN QYZ IZDEIMIN...

Úzilip-aq turatyn syzylyp-aq,
Imandy bolý kerek júzi biraq.
Boıynan oıy bıik bolsa deımin,
Tili qysqa, etegi uzynyraq.

Men qyz izdeımin...
Kóp kózine túsýge uıalatyn,
Meni ǵana júrekpen súıe alatyn.
Áke-sheshem maqtanyp qonaǵyna,
"Mynaý meniń kelinim" deı alatyn.

Men qyz izdeımin...
Áńgimeniń aıtatyn shyn-aıqynyn,
Jyndylaý minezime shydaıtuǵyn.
Meni bireý jamandap otyrǵanyn,
Estip qalsa eńkildep jylaıtuǵyn.

Men qyz izdeımin...
Bireýdiń baılyǵyna qaramaıtyn,
Mendegi bar nárseni baǵalaıtyn.
"Erim ǵoı" dep aldymda bas ıetin,
Ózin menen aqyldy sanamaıtyn.

Men qyz izdeımin...
Júrekte Alla, aýzynda táýbasy bar,
Aralasa bermeıtin daýǵa shubar.
Joq nárseni izdeý de qıyn eken,
Biraq, bar da shyǵar...

***

ÓMIR-AI

Arlanyp, namystanyp, aıbarlanǵam,
Ne taptym toqal úıge baılanǵannan?!
Ómir-aı, joqshylyqtan jalyqtym men,
Baılar da jalyqsa ǵoı baı bolǵannan.

Jalǵyz-aq shapanym bar, jyrtyq ol da...
Jyrtyǵymdy jamasam qulpyram ba?
Tıyn-tebenderimnen teńge qurap,
Qaǵaz aqsha ustaıtyn kún týar ma?!

Ómir-aı, seni bir sát jaqtyraıyn,
Bere salsań qaıtedi baqty daıyn?!
Quryǵanda basyma bórik bershi,
Qýanǵanda aspanǵa laqtyraıyn.

Ómir, sıpamasań da kekilimnen,
Aýlaqpyn kúpir sóılep, lepirýden.
Baılardaı alshań basyp júre berem,
Qaryzǵa satyp alǵan etigimmen.

Ómir-aı, meniń sende jumysym ne?
Kerek emes altyn da, kúmisiń de.
Baı bolmaǵan jaqsy qoı, uıqym tynysh,
Urylar túspeıdi úıge tún ishinde...

***

QAIRAN BALALYQ

Kez qaıda asyq atyp, láńgi oınaǵan,
Dop teýip, tezek terip, arba aıdaǵan.
Apyraı, túsinbeımin... osy nege
Máńgilik bala bolyp qalmaıdy adam?
Eseıgen qandaı jaman?

Partalas qurby qaıda synyptaǵy,
Dos qaıda shuryq-tesik shulyqtary?
Solarmen asyr salyp oınar edim,
Aldymnan bir shyqsa ǵoı kúlip taǵy.
Ketti ǵoı quryp bári.

Keshe men ǵashyq bolǵan sulý qaıda,
Oǵan endi basqalar qyryndaı ma?
Ol arý maǵan qaıtyp jolyqpaı ma,
Ol úshin baqshadan gúl julynbaı ma?
Ol kezder burylmaı ma?!

Kórshim qaıda bir nandy bólip jegen?
Dastarhanda shyrqaıtyn kóńildi óleń.
Esigin qaqpaı kirip tar úıiniń,
Otyratyn edim ǵoı tórin de men.
Ótti ǵoı ómir degen.

Al qazir sol qyzyqtyń qaıda bári?
Ishimdi órtep barady qaıǵy alaýy.
Saǵynady adamdar ótken shaǵyn,
Qazirgi túrin kórse aınadaǵy.
Bári-bári kelmeske aınalady.

***

SÁBI BOLǴYM KELMEIDI

Jetim kórsem jylaımyn keıde ókirip,
Shyndyǵymdy bireýler deıdi ótirik!
Sábı bolǵym kelmeıdi, sábı bolǵym,
Júkti bolǵan sulýǵa úıde otyryp.

Jetim kórsem batamyn qusa-muńǵa,
Qusa-muńdy quryqtap, tusadym ba?
Sábı bolǵym kelmeıdi, sabı bolǵym,
Kúıeýi joq áıeldiń qushaǵynda.

Jetim kórsem shymyrlar shekem-denem,
Nege odan da shekemniń eti ólmegen?!
Sábı bolǵym kelmeıdi, sábı bolǵym,
Balalardyń úılerin mekendegen!

Jetim kórsem jabyǵyp jeke qalam,
Bolmasa dep tileımin kókek anam.
Sábı bolǵym kelmeıdi, sábı bolǵym,
Shetel asyp ketetin shekaradan.

Jetim kórsem qanjylap birden ishim,
Alǵa baspaı qoıady múldem isim.
Biraq, keıde keledi sábı bolǵym,
Jetimdiktiń ne ekenin bilmeý úshin.

***

JAÝLARYMA NEMESE DOSTARYMA

Dúnıege kelmeı - qaıda kelesiń?
Ómirdiń uqtym maıdan-egesin!
Dostyń aldynda aq adal bolsań,
Dushpanyńnan da paıda kóresiń.

Sorly basyma baq ta qonady,
Tastaı kóńilim maqta bolady.
Bir jaýym meni dattaǵan kezde,
Kóp dosym meni aqtap alady.

Jeńsem dep dushpan murat qylady,
Júzege aspas biraq bulary.
Bir jaýym meni kúlki qylǵanda,
Men úshin kóp dos jylap turady.

Dushpanǵa degen keter bul ókpe,
Dostardyń sózi jeter júrekke.
Bir jaýym meni jer qylǵan kezde,
Kóp dosym meni kóterdi kókke.

Jaýym men dosym - pildeı tiregim,
Ekeýine de birdeı tilegim...
Bir jaýym meniń bolmasa eger,
Kóp dosym baryn bilmeıtin edim.

***

BIR KELINShEK...

Janary jáýdiregen, tym kóńilshek,
Qoıǵandaı taǵdyryna muńly ómir shek.
Keıde bizdiń kóshede serýendep,
Júredi bir balaly bir kelinshek.

Anasy oınatyp júr bar asylyn,
Muń basqan janarynyń qarashyǵyn.
Kúıeýi qaıda eken bul áıeldiń,
Ákesi qaıda eken balasynyń?

Tústi me áldeqandaı sát esine?
Kelinshek nalyǵandaı qatesine...
Balasy sheshesine uqsamaıdy,
Shamasy, tartqan shyǵar ákesine.

Qasqaıyp turǵan anaý munara tik,
Áıelge áser etpes bul ara túk.
Qasyna serigi erip júrmegesin,
Basyna qonbaǵan ǵoı sirá, baqyt.

Júıkesin juqartqasyn qaıǵy shala,
Armany adamdardyń aıǵa usha ma?
Aımalap aıdarly ulyn otyrady,
Aı jaryǵy túskenshe baıǵus ana.

Týa ma álgi áıelge kóńildi kún,
Syılaıdy oǵan baqytty ómirdi kim?!
Taǵy jyljyp barady jalǵyz aqqý,
Sońynan ertip alyp kógildirin.

Sezimi gúldeı solyp erte ólmeske,
Syńar bolǵan jón shyǵar teń-teńdeske.
Balapanyn ertken jalǵyz aqqý,
Jubyn taýyp kelse eken erteń keshke...

***

AQYNDAR ÓLÝ KEREKPE?

Dókeıler - bárin kesh uǵatyndar,
Solarǵa júrmin kúlip ózim de.
"Elim" dep ótken esil aqyndar,
Eskerilmedi-aý tiri kezinde.

Búlik shyǵaryp buqara qıly,
Talaı aqynnyń ezilgen ary.
Muzbalaq aqyn Muqaǵalıdy,
Muqatyp edi kezinde bári.

Arystan bolyp janym aqyrdy,
Kóńilim quryǵyr alańdaı berdi.
Taýdaı talant Tabyl aqyndy,
Izdegen adam taba almaıdy endi.

Tiri kezin de Orazalyny,
Qaısysyń qashan taǵylym qyldyń?
Qara jamylyp janaza kúni,
Qabirin qazyp, qadirin bildiń!

Sabyrmen qarap - ashýly ekpinge,
Jaıyqta kóndi sumdyqqa búgin.
Asyǵys ketken Asylbektiń de,
Asyqpaı júrip bildik qadirin.

Fánıden ketse shyn daryn ótip,
Ómirge qaıtyp keltirmeısińder.
Ólmeıtin óleń-jyrlaryn oqyp,
Ólermen bolyp eńkildeısińder.

Ómirge kelý - ólgennen qıyn!
Tiri kezimde kókıdi kókem.
Men ólsem kórge kómgennen keıin,
Jyrymdy bireý oqıdy ma eken?

Jaqtyrmas aqyn jaǵyný isin,
Qarsy emes biraq senýge kópke.
Tarıhta aqyn qalýy úshin,
Mindetti túrde ólý kerek pe?

***

JYLAMAI JÚREM

Kútetin edik tańdardan araı,
Birge bolmadyq jalǵanda qalaı?
Bizdiń mahabbat aıaqtaldy ǵoı,
Jarty saǵattyq baǵdarlamadaı!

Esim aýady eles kúnderge,
Eregespeımin men eshkimmen de.
Mensiz de janym baqytty ekensiń,
Sensiz de sorly emespin mende.

Ekeýmizge baq kelmedi nesin?
Ómirdiń aldyq bergen úlesin!
Bizdegi sezim aldamshy ekenin,
Men de bilemin, sen de bilesiń.

Hálińdi seniń suramaı bilem,
Dertime daýa sirá, qaıbir em?
Jas bolsań meniń janarymdaǵy,
Joǵaltpas úshin jylamaı júrem!

Men kimge, nege jahut teremin?
Tejegishi joq ýaqyt - kemeniń!
Ómir degeniń ótkinshi eken ǵoı,
Aldamshy eken ǵoı baqyt degeniń.

***

SEN. MEN. BIZ.

Sen kettiń be, men kettim be, kettik pe,
Jetetuǵyn jerimizge jettik pe?
Endi seni saǵynyshpen kútpeımin,
Sende meni oralady dep kútpe.
Mahabbatqa qoıaıyqshy kóp núkte...

Sen kimgesiń, men kimgemin, kimgemiz?
Bul dúnıe birde - kóktem, birde - kúz.
Sirá, janym, sen - kóktemsiń, men - kúzbin,
Birge bola almaımyz-aý múlde biz.

Sen kúrsindiń, men kúrsindim, kúrsindik,
Eki júrek kúrsingeni - bir sumdyq.
Baqyttan bas tartpaımyz dep qulshyndyq,
Biz baqytty bola almadyq bul shyndyq.

Sen basqasyń, men basqamyn, basqamyz,
Áýel basta jolyqtyq-aý bosqa biz.
Seni oılap júregimmen jyr jazdym,
Meni oılap janaryńnan jas tamyz!

Sen amansyń, men amanmyn, amanbyz,
Aman bolsaq bir kezdesip qalarmyz.
Bolar-bolmas mahabbatqa adalmyz,
Baqytymyz bolsa izdep tabarmyz.
Hosh bol, jaqsy... Jaman qyz!

***

ÓMIR. ÓLEŃ. ÓLIM.

Men nege "ólim" jaıly jaza berem?
"Ólim" maǵan sııaqty ǵajap óleń!
Ajal aıtpaı keletin bolǵasyn ba?
Qabirimdi qalammen qaza berem!

Bilmeımin, kóp pe álde az ba sherim?
Sherimniń shertip júrmin nazdy áserin.
Máńgi ómir súrýge jaratylsam,
"Ólim" jaıly ólsem de jazbas edim!

Tiriler aspanǵa atsyn bórkin meıli,
Ólgende - o dúnıeni tórkindeıdi.
Ómir meni bir kúni óltiredi,
Óleń meni eshqashan óltirmeıdi!

Qalam nege jazady nala-muńdy oı?
Eee, men biraq, ózimshe danamyn ǵoı.
Tiri kezde jazbasam "ólim" jaıly,
Ólgen kezde jaza almaı qalamyn ǵoı!

Eı, baı-kedeı, aryqtar, mes qaryndar,
Daıyn bolsyn "bes paryz - bes qarýlar".
O, dúnıe de taǵy bir ómir bar ǵoı,
Ólmeı turyp "ólimdi" eske alyńdar!

"Adyrna" ulttyq portaly

 

Pikirler