Ortalyq saılaý komıssııasy halyqaralyq uıymdar men shet elderdiń baıqaýshylaryn akkredıtteý máselesin qarady, dep habarlaıdy Sputnik Qazaqstan tilshisi.
Komıssııa múshesi Záýresh Baımoldınanyń aıtýynsha, osy ýaqytqa deıin 125 baıqaýshy akkredıtaııadan ótken bolatyn. Sonyń ishinde 109 adam TMD men TMD parlamentaralyq assambleıasynan, EQYU demokratııalyq ınstıtýttar jáne adam quqyqtary bıýrosynan, sondaı-aq, Islam yntymaqtastyǵy uıymynyń atynan keledi. Qalǵan 16 baıqaýshy – Armenııa, Grýzııa, Bolgarııa, Malaızııa, Moldova, Latvııa, Reseı men Túrkııanyń saılaý organdarynyń ókilderi.
"Syrtqy ister mınıstrliginen taǵy birqatar mıssııalardyń baıqaýshylaryn akkredıtteýge usynystar kelip tústi. Onyń ishinde 63 baıqaýshy Eýropadaǵy qaýipsizdik jáne yntymaqtastyq uıymynyń parlamentaralyq assambleıasynan, 24 baıqaýshy Shanhaı yntymaqtastyǵy uıymynan, 19 baıqaýshy TMD elderinen jáne 10 baıqaýshy túrkitildes elderdiń parlamentaralyq assambleıasynan keledi. Sonadı-aq, Ázerbaıjan, Belarýs, Latvııa jáne Mońǵolııadan 7 baıqaýshy usynylyp otyr", - dedi Baımoldına.
Osylaısha, búgingi otyrysta taǵy 123 baıqaýshyny akkredıtteý máselesi qaraldy. Komıssııa músheleri qaýlyny biraýyzdan qoldady. Buǵan deıin akkredıtaııa alǵandardy sanaǵanda baıqaýshylardyń jalpy sany 248-ge jetti. Usynystardyń túsýine qaraı atalǵan tizim 3 maýsymǵa deıin jańartylatyn bolady.
Prezıdent saılaýy
9 maýsymda ótetin prezıdent saılaýyna 12 067 475 bıýlleten daıyndalady.
Kandıdattar saılaý bıýlletenine memlekettik tildiń álipbılik tártibimen tegi, aty, ákesiniń aty kórsetile otyryp engiziledi. Osyǵan sáıkes, kandıdattar bıýlletende mynadaı tártippen kórsetiledi:
- Ahmetbekov Jambyl Áýjanuly;
- Espaeva Danııa Mádıqyzy;
- Qosanov Ámirjan Saǵıdrahmanuly;
- Raqymbekov Tóleýtaı Sataıuly;
- Taspıhov Amangeldi Satybaldyuly;
- Toqaev Qasym-Jomart Kemeluly;
- Túgel Sádi-Bek.
