Úsh jyl buryn ortalyqtyń bir basshysy 9 mıllıon teńgeniń "Toıota-Kamrı" markaly sý jańa avtokóligin para retinde alǵan
Memlekettik qyzmet isteri jáne sybaılas jemqorlyqqa qarsy is-qımyl agenttigi ulttyq testileý ortalyqtyń eki basshysyn para úshin ustady, dep habarlaıdy Sputnik Qazaqstan tilshisi.
Qoǵammen baılanys departmentiniń dırektory Arman Berdalınniń aıtýynsha, osy aptada bilim jáne ǵylym mınıstrligine qarasty ulttyq testileý ortalyǵynyń basshylyǵy jasaǵan sybaılas jemqorlyq shemasy áshkerelendi. Máselen, ortalyqtyń 2016 jylǵy basshysy memlekettik satyp alýlar kezinde jeke menshik kompanııaǵa lobbı jasaǵan. Sol úshin 9 mıllıon teńgeniń "Toıota-Kamrı" markaly sý jańa avtokóligin para retinde alǵan. Avtokólik tárkilendi. Sotqa deıingi tergeý sharalary jedeldetilgen túrde júrgizilip jatyr.
"Sondaı-aq, osyǵan uqsas zańsyz áreketter úshin ortalyqty 2017 jyldan bastap osy ýaqytqa deıin basqarǵan tulǵaǵa qatysty sotqa deıingi tergeý amaldary bastaldy. Ol 2017-2018 jyldar aralyǵynda deldal arqyly júıeli negizde asa iri kólemderde para alyp otyrǵan. Sot sankııasymen kúdiktige qatysty kúzetpen ustaý túrindegi bultartpaý sharasy qoldanyldy", - dedi Berdalın elordada ótken baspasóz máslıhatynda.
Resmı málimetke sáıkes, sońǵy úsh jyldyń ishinde bilim salasynda 620 sybaılas jemqorlyq faktisi anyqtaldy. Odan memleketke kelgen shyǵyn 1,5 mıllıard teńgeni qurady.
"364 tulǵa áshkerelendi. Sonyń ishinde 57 mektep dırektory, 10 kolledj dırektory jáne 22 balabaqsha meńgerýshisi bar", - dep atap kórsetti Berdalın.
