Ekologııa jáne tabıǵı resýrstar mınıstrligi ýaqyt beldeýiniń ózgerýi týraly aqparatqa qatysty pikir bildirdi, dep habarlaıdy «Adyrna» ulttyq portaly Massaget.kz saıtyna silteme jasap.
Áleýmettik jelide tarap jatqan aqparatta birneshe óńirde ýaqytty bir saǵat alǵa jyljytý josparlanǵany aıtylǵan.
«Osyǵan baılanysty Qazaqstannyń batys óńirleri, atap aıtqanda: Aqtóbe, Atyraý, Batys Qazaqstan, Qyzylorda, Mańǵystaý oblystary 2023 jylǵy 30 qarashadan 1 jeltoqsanǵa qaraǵan túni (00:00-de) elorda ýaqytyna, bir saǵatqa aýystyrylady», – delingen mátinde.
Ekologııa mınıstrligi qazir Qazaqstanda ýaqytty esepteýdiń biryńǵaı tártibin belgileý máselesi zerttelip jatqanyn rastady.
«Ekologııa jáne tabıǵı resýrstar mınıstrligi Saýda jáne ıntegraııa mınıstrligimen jáne basqa da múddeli uıymdarmen birlesip Qazaqstan Respýblıkasynyń aýmaǵynda ýaqytty esepteýdiń biryńǵaı tártibin belgileý máselesin zerdelep jatyr. Depýtattardyń, ortalyq memlekettik organdardyń, qoǵam pen ǵylymı uıymdar ókilderiniń qatysýymen jumys toby quryldy», – dedi vedomstvo ókilderi.
Alaıda Ekologııa mınıstrligi ókilderi qazir bul másele boıynsha sheshim qabyldanbaǵanyn aıtty. Sheshim máseleni egjeı-tegjeıli zerdelegennen keıin, sondaı-aq, qoǵamdyq talqylaýdan keıin qabyldanady.
«Qazir Qazaqstan Respýblıkasynyń aýmaǵynda ýaqyt eki ákimshilik ýaqyt beldeýinde esepteledi: 4-shi (BQO, Aqtóbe, Atyraý, Qyzylorda, Mańǵystaý oblystary) jáne 5-shi (Astana, Almaty, Shymkent, Aqmola, Almaty, Qaraǵandy, Ulytaý, Túrkistan jáne basqa da oblystar)", – dedi Ekologııa mınıstrliginen.
«Adyrna» ulttyq portaly
