Qoǵamdyq damý basqarmasy ákimdi aqtap alý úshin ótirik aıtyp otyrǵan joq pa?

3443
Adyrna.kz Telegram
Foto: vıdeodan alyndy
Foto: vıdeodan alyndy

Túrkistan oblysy, Sozaq aýdany, Taýkent qalashyǵynyń ákimi Serik Mamanov kámelettik jasqa tolmaǵan balalardy jınap alyp, shymkenttik ımam Jarqyn Myrzataıdyń ýaǵyzyn tyńdatqyzǵan. Túrkistan oblysynyń Qoǵamdyq damý basqarmasy kent ákimi Serik Mamanovtyń osy is-áreketin aqtap otyr, - dep habarlaıdy "Adyrna" ulttyq portalynyń tilshisi.

Serik Mamanovtyń bastamasymen ótti delingen ýaǵyzdy júrgizgen ımam Jarqyn Myrzataı jetkinshekterdi ata-anasyna qarsy qoıatyn "Qudaıdyń paryzynyń aldynda áke-shesheń demalady", "Ata-anadan namaz oqý, oramal taǵý úshin suranbasa da bolady" degen áıgili sózderimen tanymal.

Bul vıdeo “Adyrna” ulttyq portalynyń áleýmettik jelidegi paraqshalarynda da jarııalanǵan edi.

Sol beınejazbaǵa qatysty Túrkistan oblystyq Qoǵamdyq basqarmasynan tómendegi suraqtarǵa jaýap berýdi suraǵanbyz.

1. Memlekettik qyzmetkerdiń, ıaǵnı ákimniń kámelettik jasqa tolmaǵan jastardy jınap, ýaǵyz tyńdatýy qanshalyqty zańdy?

2. Ideologııalyq turǵyda ákimniń kámelettik jasqa tolmaǵan balalardy jınap alýǵa, olarǵa dinı ýaǵyz aıtqyzýǵa quqy bar ma? Bul onyń ákimdik mindetine kire me?

3.  Imam jas jetkinshekterge: «ata-anadan namaz oqý úshin, oramal taǵý úshin suranbasa bolady» dep ýaǵyz aıtady. Bul jastardy ata-anaǵa qarsy qoıý emes pe?

4. Qazaqstan – zaıyrly memleket. Sol zaıyrly memlekettiń memlekettik qyzmetkeriniń din isine qol suǵýyna Túrkistan oblysynyń Qoǵamdyq damý basqarmasy qandaı baǵa beredi?

Bul suraqtarǵa oblystyq Qoǵamdyq damý basqarmasy bylaı jaýap bergen. Qarańyz:

"2023 jylǵy 18 tamyz kúni Jarqyn Myrzataı esimdi ýaǵyzshy Sozaq aýdanynyń Taýkent kentine kelip, «Aq bosaǵa» dámhanasynda jastarmen kezdesý ótkizgen. Kezdesýdi «Jynys ata» meshitiniń ımamy N.Myrzabekov bastaǵan dinı jamaǵat uıymdastyrǵan.

Sozaq aýdanynyń Taýkent kenti ákimi S.Mamanovtyń is-áreketinde memlekettik qyzmetshilerdiń qyzmettik ádep qaǵıdalaryna sáıkes, Sozaq aýdany ákimi apparatynyń basshysy ádep jónindegi ýákili tarapynan 21.08.2023 jyly qyzmettik tekserý júrgizildi jáne Qazaqstan Respýblıkasy memlekettik qyzmetshileriniń Ádep kodeksiniń normalaryn saqtaý jáne buzýshylyqtardyń aldyn alý boıynsha otyrys ótkizildi.

Májiliste Taýkent kenttiniń ákimi S.Mamanovtyń máselesi qaraldy. Nátıjesinde atalǵan kezdesýdi «Taýkent kenti ákimi apparaty» memlekettik mekemesi uıymdastyrmaǵan jáne S.Mamanov kenttiń jastary men balalaryn dinı ýaǵyz tyńdaýǵa shaqyrmaǵan.

Uıymdastyrýshylardyń shaqyrtýymen baryp, atalǵan kenttiń turǵyny retinde qatysqan. Sondaı-aq, 2023 jyldyń 01 tamyzynan bastap 06 qyrkúıek aralyǵynda kent ákimi S.Mamanov kezekti eńbek demalysynda bolǵany anyqtaldy.

Taýkent kenti ákimi S.Mamanov tarapynan QR «Qazaqstan Respýblıkasynyń memlekettik qyzmeti týraly» Zańynyń, Ádep kodeksiniń talaptary buzylmaǵandyǵy anyqtalyp, aldaǵy ýaqytta zań talaptaryn qatań saqtaý boıynsha túsindirildi" delingen.

Jaýaptan ańǵarǵanymyz Taýkent qalasynyń ákimi Serik Mamanov 1-tamyz ben 6-qyrkúıek kúni arasynda eńbek demalysynda bolypty. Biraq, aýdannyń áleýmettik jelidegi paraqshalarynan aıtylǵan merzim aralyǵynda ákimniń eńbek demalysynda bolmaǵanyn, kúndelikti jumysynda júrgenin baıqadyq.

Mysaly, 10 tamyz kúni Taýkent kentiniń ákimi turǵyndarmen kezdesip, jurt aldynda esep bergen. Qarańyz: 

Túrkistan oblysynyń Qoǵamdyq damý basqarmasy bir ótirikti jabý úshin ekinshi ótirikti aıtyp otyrǵan joq pa? Endigi qoıylar saýal osy...

Qanat Birlikuly

Adyrna ulttyq portaly

Pikirler