Qazaqstannyń Eńbek Eri, bilikti pedagog Aıagúl Mırazova qoǵamda daý týdyrǵan máseleniń biri oqýshylar arasynda oramal tartyp, bilim oshaǵyna mektep formasymen emes, hıdjab kıip kelýdi qup kóretinderge qatysty oıyn aıtty, dep jazady "Adyrna" portaly. Bul týraly "Egemen Qazaqstan" jarııalady.
«Bilim salasynda baıyrǵydan kele jatqan, úlgi alarlyq, ónege bolarlyq mekteptiń kıim úlgisi bar. Táýelsiz el atanǵanǵa deıin de oqýshy atanǵan jastar arnaıy mektep formasyn kıdi. Sodan oqýshylar bilimsiz, tárbıesiz, tipti dinsiz boldy deı alamyz ba? Olardyń ımanynyń álsireýine, biliminiń tómendeýine mektep formasy áser etti deý qısyndy ma? Árıne joq! Sapaly bilim aldy, ónegeli tárbıemen eseıdi mektep qabyrǵasynda olar. Áli de solaı. Biryńǵaı forma ne úshin qajet? Baı men baǵlannyń balasy da, qarapaıym otbasynyń oqýshysy da biryńǵaı kıim úlgisimen júredi. Ata-ana da básekelestik dep bas aýyrtpaıdy, balanyń da kóńili buzylmaıdy áleýmettik teńsizdikti oılap. Onsyz da túrli reformany bastan ótkerip, alaǵaı da bulaǵaı baǵdarlamalarǵa maltyǵyp qalǵan mektepte endi kıim úlgisin retke keltirdik pe degende hıdjab, oramal máselesi dúrkin-dúrkin kóterilip jatyr. Qaı zamanda qazaqtyń qyzy qara jamylyp, tars búrkenip edi? Ata-babamyz ıslam dinin ustanbady ma? Bes ýaqyt namazyn qaza qylmaı ótemedi me? Olar qaı qyzyna hıdjab kıgizip, tumshalady? Qazaq qan jutqan qaıǵynyń ortasynda da qara tústi kıim kımegen. Aq oramaldy qyzy jat jurttyq atanyp, ózge úıdiń bosaǵasynan kelin bolyp oń aıaǵymen attaǵan sátten bastap tartqan.
Ǵumyrymnyń elý jylǵa jýyq ýaqytyn ustazdyqqa arnadym, áli de osy salada eńbek etip kelemin. Keıingi kezde jylt etpe jyltyraqqa áýestigimiz artyp, ózgeniń saltyna yqylasymyz ulǵaıyp bara jatqandaı kórinedi. Jyl saıyn jańa oqý jyly bastalǵannan oramal men hıdjab daýy órshıdi de, sońǵy qońyraýǵa deıin ulasady. Mektep – bilim nárin quıatyn orta, balanyń keleshekte qandaı mamandyq ıesi atanaryna baǵdar silteıtin shańyraq. Zań talaby barlyǵyna da birdeı oryndalady, bári de soǵan baǵynýy tıis. Bala kámelettik jasqa tolyp, ózi sheshim qabyldaıtyn kezeńge jetkende erki biledi qandaı kıim kıetinin. Sondyqtan kez kelgen ata-ana balasyn mektepke oranyp kelýin emes, bilim alsyn, oqysyn, bilikti maman atanýyna jol ashylsyn dep qadaǵalaýy kerek. Ata-ana óziniń ustanǵan baǵyty, oı-pikiri durys-burystyǵyn eskermeı balasyna tańyp, májbúrlep telı berýine bolmaıdy dep sanaımyn. Barlyq bala birdeı, emin-erkin oınap, jadyrap jaınap júrip qatarlastary sekildi bilim alýǵa tolyq quqyly. Bilim salasyndaǵy talap bireý ǵana bolyp, sol talapty oryndaýǵa ata-ana da, ustaz da, memleket te mindetti bolýy tıis dep oılaımyn», dedi Aıagúl Mırazova.
