“Memlekettik tildi mindetteıtin memlekettik til týraly zań qabyldaýǵa tıispiz” dep qoǵam belsendisi Qazybek Isa óziniń áleýmettik jelisindegi paraqshasynda bólisti, dep habarlaıdy “Adyrna” tilshisi.
Qazybek Isa Facebook jelisindegi paraqshasynda til týraly zań qabyldaý qajettigin aıtyp, arnaıy jazba jarııalady. Ol 2020 jyly Assambleıada elimizdegi barlyq etnos ókilderi «Memlekettik tildi mindetteý kerek» dep, arnaıy resmı úndeý qabyldaǵanyn aıtqan. “Biz endi taǵy kimdi jáne neni kútip otyrmyz?!” dep ashynǵan belsendi til týraly zańnyń Keńes ımperııasynan esh ózgermegenin jazyp, “Til týraly zańda” til saıasatyn júzege asyrýdyń eshqandaı zańdylyq tetikteri aıqyndalmaı, naqty sharalary belgilenbegenin jasyrmady.
“Osy Táýelsizdik alǵannan keıin alǵash qabyldanǵan “Til týraly zańda” til saıasatyn júzege asyrýdyń eshqandaı zańdylyq tetikteri aıqyndalmaı, naqty sharalary belgilenbegen. Al endi odan beri 26 jylda- shırek ǵasyrdan astam bir dáýirde qoǵam múlde ózgerdi. Qazir ulttyq sanamyz múlde basqa satyǵa kóterildi. Mine, osy oraıda til saıasatyn júrgizýdiń jańa úlgisin jasap, jańa Memlekettik til týraly zań qabyldaý kerek. Sózimiz qurǵaq bolmas úshin
«Qazaqstan Respýblıkasyndaǵy til týraly» Zańynyń ómirde is júzinde oryndalmaǵanyn naqty baptaryn sanap otyryp, dáleldep bereıik”,-dedi.
Sondaı-aq depýtat Qazybek Isa ár bapqa jeke toqtalyp, til mártebesin kóterýdi usyndy.
“Sonymen qatar memlekettik tildiń mártebesine qatysty QPK-niń 30-baby, ÁQBtK-niń 738- baby boıynsha da Qazaqstanda qylmystyq, ákimshilik quqyq buzýshylyq týraly ister boıynsha is júrgizý tili qazaq tilinde júrgiziledi, sot isin júrgizý de memlekettik tilde júrgizilýi kerek.
Bul da 30 jylda oryndalmaǵan zań. Iaǵnı, bir sózben aıtqanda, Qazaqstan Respýblıkasynyń til týraly zańnamasy eldiń úmitin joıǵan «jansyz», óli zań. Sondyqtan bul «Qazaqstan Respýblıkasyndaǵy til týraly» zańdy saıası-qoǵamdyq bankrot dep jarııalaý qajet! Memlekettik tildi mindetteıtin Memlekettik til týraly zań qabyldaýǵa tıispiz!”,-dep úndeý jasady.
