Reseılik kásipker Aleksandr Orlov qyzmettegi bólim basshylaryn tańdaǵanda olardyń artyq salmaǵyna kıligip, denesine qatty mán beretinin aıtty. Onyń mundaı tosyn málimdemesi dúıim jurttyń nazaryn aýdardy, dep habarlaıdy "Adyrna" ulttyq portaly.
- Maıy búlkildegen adamdardy jumysqa almaımyn. Shekten tys tolyq adamdardy aıtam. Ondaılardy jumysqa alyp qajet emes, óıtkeni qaýipti, - dedi ol.
Orlov artyq salmaǵy bar adamdardyń jaýapkershigi joǵary deńgeıde bolmaýy múmkin degendi de aıtty.
"Siz týǵan kezde "joǵarydan" berilgen denemen týylasyz. Al jaıylyp ketip, deneńizge jóndi qaraı almadyńyz. Bul neden habar beredi? Demek, qalǵany 100%-dyń bárin de jiberip alasyz, sonyń ishinde jumys ta bar", - dedi Orlov.
Reseılik kásipker Almatydaǵy Queen Almaty, DragonFly, Blue Cat Coffee, Manana, Tanuki meıramhanalarynyń ıesi, al Astanada oǵan Ryba Pila jáne "Orel monshalary" kesheni tıesili.
2022 jyldyń sáýirinde kásipker qazaqstandyqtardyń synyna ushyrady. Ol jergilikti kadrlar biliktiliginiń jetkiliksizdigi týraly asyryp aıtyp, basy daýǵa qaldy. Kásipker keıin óz sóziniń durys túsindirilmegenin aıtyp, aqtaldy.
"Men tek jergilikti kadrlardy oqytý úshin Qazaqstanǵa top-menedjment ákeletinimizdi aıttym, biraq bizdiń qazaqstandyq mekemelerde qyzmetkerlerdiń 99% — y qazaqstandyqtar. Men ózim renjitken adamdardan keshirim suradym", - dedi ol.
Orlov munyń bárine SMM mamandaryn aıyptap, qate sóıleýge jol berdi dep halyqty sendirmek bolǵan edi.
"Adyrna" ulttyq portaly
