Qazaqstan Respýblıkasy parlamenti majilisiniń depýtaty Murat Ábenov 2023 jyldyń 20 tamyzy kúni qadymnan jetken ulttyq tarıhı tańbalarymyzdyń joıylyp bara jatqanyn aıtyp, dabyl qaqty, dep habarlaıdy "Adyrna" ulttyq portaly.
Ózekti másele jaıly Murat Ábenov bylaı dedi:
Búgin 2023 jyldyń 20 tamyzynda biz Qazaqstandaǵy biregeı arheologııalyq, tarıhı oryn - Qyzylorda oblysynda Qarataý bókterindegi Saýysqandyq shatqalynda ornalasqan elimizdegi eń kóne petroglıfterge bardyq. Bul qasıetti oryn Qazaqstan aýmaǵyndaǵy kóne órkenıet ortalyqtarynyń biri bolǵan. Muny ǵalymdar dáleldegen.
Keıinnen ol barsha qazaqstandyqtardy mádenı muramyzdy kózdiń qarashyǵyndaı saqtaýǵa shaqyrdy:
- 500 gektar aýmaqta 8-10 myń beıneler (adamdar, janýarlar, kúımeler) tasqa qashalǵan. Keıbir qashalǵan sýretter qola dáýirine - b.z.b. II myńjyldyqqa jatady. Ókinishke oraı, biregeı tarıhı jádiger aıanyshty kúıde. Bul jerge 1 km jaqyn jerde vanadıı óndiretin kásiporyn ornalasqan jáne jumys jasaý barysynda jarylysty qoldanady. Taý jynystarynyń qurylymy óte názik, tabaqshaly, kez kelgen syrtqy áser petroglıfterdiń joıylýyna alyp kelýde. Osy qarqynmen kete berse, shuǵyl qorǵaý sharalary qabyldanbasa, 4 myń jyl tarıhy bar petroglıfterdi 4-5 jylda joǵaltýymyz múmkin. Aýmaq qorǵalmaǵan, qorshalmaǵan, baqylaý jáne esepke alý joq. Saýyskandyqtyń petroglıfterin saqtaıyq, - dedi depýtat.
"Adyrna" ulttyq portaly
