2 aqpan – Ulttyq basylym kúni bolyp bekitildi. Bul týraly Aqparat jáne qoǵamdyq damý mınıstri Darhan Qydyráli málimdedi, dep habarlaıdy “Adyrna” ulttyq portaly.
Jaǵymdy jańalyǵymyz bar. 2 aqpan – Ulttyq basylym kúni bolyp bekitildi. Bastaýynda Ahmet Baıtursynuly, Álıhan Bókeıhanuly, Mirjaqyp Dýlatuly sekildi ult zııalylary turǵan «Qazaq» gazetiniń alǵashqy nómiri osydan 110 jyl buryn, 2 aqpan kúni jaryq kórgeni belgili. Alash ardaqtylarynyń qoltańbasy qalǵan gazet ulttyq renessanstyń qaınar kózine aınalyp, halqymyzdyń aqyl-oıyn, sana-sezimin bólek arnaǵa burdy, - dep jazdy mınıstr áleýmettik jelidegi paraqshasyna.
Mınıstr Memleket basshysynyń buǵan deıin Qazaq radıosynyń 100 jyldyǵy aıasynda 1 qazandy Radıo qyzmetkerleri kúni dep resmı túrde bekitkenin eske saldy.
Endi mine, jýrnalıster qaýymy úshin taǵy bir ataýly kún belgilenip otyr.
Baspasóz salasynda eseli eńbek etip, qalam terbep júrgen barsha áriptesterimizdi ulttyq baspasóz kúniniń belgilenýimen quttyqtaımyn! - deıdi ol.
