Elorda ákimi Baqyt Sultanov kóshelerdiń tazalyǵy, qoqys shyǵarý jáne joldardyń jaǵdaıy úshin jaýaptylardyń jumysyn synǵa aldy, - dep habarlaıdy Tengrinews.kz tilshisi Nur-Sultan qalasy ákimdiginiń resmı saıtyna silteme jasap.
Búgin Baqyt Sultanovtyń tóraǵalyǵymen ákimdiktiń kezekti otyrysy ótip, onda qala tirshiliginiń ózekti máseleleri qaraldy.
"Qala kóshelerindegi qoqys máselesine erekshe nazar aýdaramyz. Búgin qala batpaqqa batqan! Maǵan málim derekter boıynsha, qazirgi tańda aýdan ákimdikteri sanıtarlyq tazalaý boıynsha merdigerlik uıymdardyń barlyǵymen kelisimshart jasaspaǵan. Aýdan ákimderi, sizder 1 naýryzda barlyq sharalardy aıaqtap, kóshelerdi tazalaýdy bastaýlaryńyz kerek edi! Bul jaǵdaıda ne isteýge bolady? Ne degen salǵyrttyq bul?! Jumystaryńyzdy qalaı josparlaısyzdar?!", - degen Sultanov memlekettik satyp alý rásimderin jedeldetýdi, sondaı-aq qalany sanıtarlyq tazalaý jumystaryn bastaýdy tapsyrdy.
Budan bólek, Baqyt Sultanov qoqys shyǵarý jumystaryna "sátsiz" degen baǵa berdi.
"Men qorshaǵan ortany qorǵaý basqarmasyna qoqys alańdary men konteınerlerdiń jaǵdaıyn erekshe baqylaýǵa alýdy, olardy tıisti jaǵdaıǵa keltirýdi jáne qoqysty ýaqytynda shyǵarýdy qamtamasyz etýdi tapsyrǵan bolatynmyn. Jumys sátsiz aıaqtaldy, tapsyrma oryndalmady! Burynǵydaı qoqys ýaqytynda shyǵarylmaıdy, qurylys qoqystary jınalady, alańdar tazartylmaıdy, olardyń jaǵdaıy polıgonnan da soraqy!", - dedi qala ákimi qorshaǵan ortany qorǵaý jáne tabıǵatty paıdalaný basqarmasynyń basshysy Musa Tanabaevqa.
Qala ákiminiń aıtýynsha, kóptegen qoqys konteınerleri búlingen. Osyǵan baılanysty Sultanov óz orynbasary Arman Turlybekke qoqys shyǵaratyn kompanııalarǵa nusqaýlyq ótkizýdi, jaýapkershilik sharalaryn kúsheıtýdi jáne barlyq qoqys alańdarynda beınebaqylaý kameralaryn ornatý máselesin pysyqtaýdy tapsyrdy. Sonymen qatar, qala kóshelerin sý basý jaǵdaıy qala ákimdiginiń alańdaýshylyǵyn týǵyzdy. Jyl basynan osy másele boıynsha 2 984 ótinish kelip túsipti.
"Qala turǵyndarynyń aldynda esep berý kezdesýinde men elordanyń budan bylaı sý astynda qalmaıtyndyǵyna ýáde bergen edim. Qar erip, jańbyr jaýdy, mine, qalanyń jartysy sýǵa batty! Jol qurylysy qalaı jobalanady? Nege sýdy tabıǵı burý júıesi qarastyrylmaǵan? Siz durys ne durys jobalamaısyz, ne máselege nemquraıly qaraısyz", - dedi Sultanov kólik jáne jol-kólik ınfraqurylymyn damytý basqarmasynyń basshysy Ashat Qaraǵoıshınge qarata.
Ol, sondaı-aq, avtomobıldik joldardyń, ásirese qar erigennen keıingi jaı-kúıi sapasynyń syn kótermeıtindigin alǵa tartty. Jınalys qorytyndysy boıynsha qala ákimi avtokólik joldary qurylysynyń barysy men sapasyn jáne olardy paıdalanýǵa berýdi baqylaýdy kúsheıtýdi tapsyrdy.
