Mańǵystaýdaǵy balabaqsha memlekettik satyp alý portalynda prınterdiń bir danasyn 10,7 mln teńgeden almaq bolǵan. Bul týraly Sybaılas jemqorlyqqa qarsy qyzmet departamenti basshysynyń birinshi orynbasary Birjan Haırýllın aıtty, dep habarlaıdy «Adyrna» tilshisi.
«Óńirde memlekettik satyp alýdy tıimsiz josparlaıtyn mekemeler bar. Mysaly, Túpqaraǵan aýdandyq bilim bólimine qarasty memlekettik balabaqshalardyń biri 32,1 mln teńgege 3 dana prınter satyp alýdy josparlaǵan. Iaǵnı, prınterdiń bir danasyn 10,7 mln teńgeden satyp alýdy kózdegen. Alaıda, joǵaryda kórsetilgen taýardyń naryqtaǵy quny - 100 myń teńge. Departament bergen usynym hattyń negizinde memlekettik satyp alý jospary qaıta qaralyp, 31 mln teńge qarajat únemdeldi»,-dedi ol.
Aıta keteıik, memlekettik organdar men mekemelerdiń, kvazımemlekettik sektor sýbektileriniń satyp alatyn taýar nemese qyzmetteriniń baǵalaryna monıtorıng memlekettik satyp alýdyń josparlaý satysynda jáne naryqtyq kórsetkishtermen salystyrý arqyly júrgiziledi.
