Dondaǵy Rostov kóshelerinde qarýly adamdar men tankter paıda boldy. Birqatar derekkózderge sáıkes, bul Wagner PMC bólikteri. Qala ákimdigi turǵyndardy múmkindiginshe úılerinen shyqpaýǵa, kólikti paıdalanbaýǵa shaqyrýda, dep habarlaıdy “Adyrna” ulttyq portaly reseılik BAQ-qa silteme jasap.
Biz Rostovty qorshap alyp, Máskeýge baramyz, - dedi Evgenıı Prıgojın Rostovtaǵy Ońtústik áskerı okrýginiń shtab-páterinde Reseı qorǵanys mınıstriniń orynbasary Iýnýs-Bek Evkýrov jáne Bas shtab bastyǵynyń orynbasary Vladımır Alekseevpen kezdesýinde.
Sondaı-aq, ol qaladaǵy barlyq áskerı nysandar, sonyń ishinde aerodrom jaldamalylardyń baqylaýynda ekenin aıtty.
Ázirge Reseı bıligi bul málimdemeni resmı rastaǵan joq. Biraq, Dmıtrıı Peskovtiń baspasóz hatshysy TASS aqparat agenttigine aıtqandaı, Vladımır Pýtın «jaqyn arada» úndeý jasaýy kerek.
Conflict Intelligence Team jobasynyń jetekshisi Rýslan Levıev qalada vagnerıtter emes, Qorǵanys mınıstrliginiń áskerı qyzmetkerleri turǵanyn aıtady. Bul týraly da vedomstvo túsinikteme bermedi.
Belgili bolǵandaı, senbi kúni tańerteń Voronejge qaraı federaldyq tas joldyń boıymen áskerı tehnıkalar korteji júrip kele jatqan. Jergilikti aımaqtyq bılik turǵyndardy «jaǵdaı baqylaýda» dep sendirip, sabyr saqtaýdy surady. Qaladaǵy barlyq qoǵamdyq is-sharalar toqtatyldy.
Al, Máskeý meri málimdegendeı, qalada lańkestikke qarsy sharalar júrgizilýde.
Joldarda qosymsha baqylaý engizildi. Buqaralyq sharalardy ótkizýdi shekteýge bolady, - dedi Sergeı Sobıanın turǵyndardan aqparatqa túsinistikpen qaraýdy surap.
Eske salaıyq, juma kúni Prıgojın Reseıdiń Ýkraınada jeńilip jatqanyn, eldiń shyǵyny orasan ekenin, maıdandaǵy jaǵdaı týraly prezıdentti aldap jatqanyn aıtty. Ol barlyq jaýapkershilikti Qorǵanys mınıstrliginiń basshylyǵyna, jeke onyń basshysy Sergeı Shoıgýǵa júktep, «Ádilet marshynyń» bastalǵanyn jarııalady. Keıin Bas prokýratýra Evgenıı Prıgojınge qarsy qarýly kóteriliske shaqyrý baby boıynsha qylmystyq is qozǵalǵanyn habarlady.
