Mekeme málimetinshe, Tótenshe jaǵdaılar mınıstri Syrym Sháriphanov elorda mańyndaǵy TJ ornyna baryp, órtti tez arada sóndirý úshin qajetti kúshter men quraldardy iske jegip, TJM Kazavıaqutqarý avıatehnıkasyn qosymsha tartýdy tapsyrǵan.
"Qazirgi ýaqytta órt sóndirýge Qazavıaqutqarý sý aǵyzý qurylǵysy bar MI-8 borty qosymsha tartylyp, búgin tańerteńnen bastap órt oshaqtaryna áýeden 17 ret 51 tonna sý tókti. Órt sóndirý ornynda Astana qalasy, Aqmola jáne Qaraǵandy oblystary TJD jeke quramynyń 185 adamy jáne 37 birlik tehnıkasy, qala ákimdiginiń 6 sýarý mashınasy jumyldyryldy", - dep jazdy Astana qalasy TJD baspasóz qyzmeti.
Zakon.kz-tiń habarlaýynsha, Astana qalasynyń ákimdigi jáne Klýb dobrıakov eriktiler komandasy elordalyq órt sóndirýshilerdi ystyq tamaqpen jáne sýsynmen qamtamasyz etken.
Astana qalasynyń tótenshe jaǵdaılar departamenti turǵyndardan órt qaýipsizdigi erejesin saqtaýǵa shaqyrdy.
"Órt qaýipsizdigin, balalar otpen oınamaýyn qadaǵalańyz, temeki tuqylyn tastamańyz! Órt qaýipti kezeńde órttiń paıda bolý qaýpi artady. Ásirese, otpen abaısyz bolý jaǵdaılary artady", – delingen habarlamada.
"Adyrna" ulttyq portaly
