Ekibastuz qalasyndaǵy №25 qazaq qyzdar gımnazııasyna ashylǵanyna 25 jyl bolsa da, áli kúnge deıin jeke ǵımarat buıyrmaı keledi. Búginde bul bilim ordasy 1200 balaǵa laıyqtalǵan №24 orys mektebiniń ǵımaratynda otyr. Mektep ákimshiligi áý basta ǵımarattyń bir qanatynan 200 oryn ǵana bólgenimen, shırek ǵasyrda gımnazııadaǵy bala sany 400-den asty.
Ashana, medpýnkt, sportzaldy eki mektep ortaq paıdalanady. Mundaıda ǵımarat ıesi retinde №24 mektepke basymdyq beriletini aıtpasa da túsinikti. 25 jylda bul gımnazııa bilim kórsetkishi jaǵynan qaladaǵy úshtiktiń qataryna engenin de aıta ketý lázim. Gımnazııa ujymy men ata-analar jeke ǵımarat surap, Bilim jáne ǵylym mınıstrligine birneshe jyl qatarynan hat joldaǵanymen, aqyry esh nátıje shyqpady. Byltyr oblys ákimi Bolat Baqaýov bul máselege núkte qoıyp, Qazaq qyzdar gımnazııasy úshin jańa ǵımarat salynbaıtynyn jetkizdi. Oǵan sebep, Ekibastuz qalasynyń mektepterinde bilim alyp júrgen 19 myń balaǵa ǵımarat jetkilikti eken. Tıimdi joly - jartylaı bos turǵan mektepterdi bir-birine qosý, ıaǵnı ońtaılandyrý júrgizý. "Al endi qandaı mektepter jartylaı bos tur?" degen saýalǵa kelsek, 6-ýy da orys mektebi ekeni anyqtaldy. Belgilisi, bıyl reıtıngisi tómen, bala sany az №23 orys mektebine 250 balaǵa laıyqtalǵan ǵımaratta otyrǵan №35 orys mektebi kóshpek. Bul mekteptiń bastaýysh blogy №13 orys mektebiniń ǵımaratynda otyr. Sondyqtan №23 mektepten bosaǵan, daǵaradaı ǵımaratqa kóshýge olar, árıne, qýana-qýana kelisedi.
Resmı derekke júginsek, bıylǵy jańa oqý jylynda Ekibastuz óńirinde 3500 bala mektep tabaldyryǵyn attamaq. Bilýimizshe, solardyń ishinde, 1500-y ǵana qazaq mektepterine barady. Buǵan sebep, ata-analar balalaryn reıtıngisi joǵary qazaq mektepterinde oqytýǵa yntaly. Al mundaı mektepterdiń basy artyq bala qabyldaýǵa múmkindigi joq. 1200-1500 balaǵa arnalǵan mektepti jergilikti bılik "bala sanyn toltyra almaı qala ma?" degen qaýippen qazaq qyzdar gımnazııasyna qııar emes.
Qyzdar gımnazııasynyń dırektory Salamat Izbastına bolsa, ózderi otyrǵan №24 orys mektebiniń ǵımaratyn №25 qyzdar gımnazııasyna berse, balalarmen toltyra alatynyna senimdi. «Birinshiden, ǵımarat ortalyqta ornalasqan. Ekinshiden, gımnazııadaǵy muǵalimderdiń deńgeıi joǵary. Úshinshiden, qyzdar gımnazııasynyń el ishindegi mártebesi joǵary. Ekibastuzdaǵy ár qyz bala atalǵan bilim ordasynda oqýdy armandaıdy», – deıdi. Qazaq qyzdar gımnazııasynda bilim alatyn 450-deı oqýshynyń ata-anasy balasynyń ne ashanasy, ne sport zaly, ne akt zaly joq, eski ǵımaratta bilim alýyna narazy. Al mundaı ábden tozyǵy jetken, ıt baılasa turǵysyz ǵımaratqa qarakóz qyzdardy kóshirý - ulttyq múddeni satýmen birdeı emes pe?
Darııa Erǵazına
"Adyrna" ulttyq portaly
