Bas prokuratura Forbes tızımıne engen käsıpkerdıŋ Almaty oblysyndaǧy jerın tärkılegenın mälımdedı, dep habarlaidy «Adyrna» tılşısı.
"Memleket basşysy bırneşe ret, onyŋ ışınde 2022 jylǧy 1 qyrküiektegı joldauynda jer telımderı tanymal adamdarǧa tiesılı bolǧandyqtan, fermerlerge auylşaruaşylyq jerlerdıŋ joǧyn atap ötıp, egıstık aumaqtar men jaiylymdardy paidalanudyŋ tiımdılıgın arttyru jönınde şaralar qabyldauǧa şaqyrdy. Almaty oblysynyŋ prokuraturasy el basşylyǧynyŋ tapsyrmasyn oryndau barysynda Forbes tızımıne kıretın käsıpkerge 2017 jyly Eŋbekşıqazaq audanyndaǧy zaŋsyz berılgen jerlerdı tärkıledı. 3500 ga būl jer jaiylymǧa arnalǧan jerler tızımınen alynyp tastalǧan”, - dep habarlady Bas prokuraturanyŋ baspasöz qyzmetı.Äleumettık jelılerde taraǧan aqparatqa säikes, "Forbes tızımındegı käsıpker" oligarh dep Qazaqstandaǧy eŋ bai 35-şı adam retınde tanymal, äl-auqaty 214 million dollarǧa baǧalanǧan Iаkov Shai boluy mümkın. Bas prokuraturanyŋ habarlamasynda "Forbes tızımındegı käsıpkerdıŋ" esımı atalmaǧan, bıraq "qazırgı uaqytta üşınşı tūlǧalarǧa jerdı qaita beru faktılerın boldyrmau maqsatynda osy jerlerdı jergılıktı tūrǧyndar üşın qoǧamdyq jaiylymdarǧa beru boiynşa jūmys jürgızılıp jatyr" delıngen. "2023 jyldyŋ basynan bastap joǧary lauazymdy tūlǧalar men ırı biznesmenderge tiesılı kadastrlyq qūny T714 mln bolatyn 26,8 myŋ ga jer memleketke qaitaryldy. Būl jerler jyldar boiy maqsatyna sai paidalanylmady, jemşöp daqyldary ösırılmedı, osy şaruaşylyqtardyŋ balansynda auylşaruaşylyq januarlary bolmady. Sonymen qatar, basqa da adal fermerler egıstık jäne jaiylymdyq jerlerge öte mūqtaj boldy", - dep atap öttı qadaǧalau organy.
Ūqsas jaŋalyqtar
