Máýlen Áshimbaev Senattyń jalpy otyrysynda premer-mınıstrdiń orynbasary – qarjy mınıstr Erulan Jamaýbaev pen Tótenshe jaǵdaılar birinshi vıe-mınıstri Ibragım Kúlshimbaevqa TJ salasyna kúrdeli reforma júrgizý keregin aıtty, dep habarlaıdy “Adyrna” ulttyq portaly.
Erulan Kenjebekuly, Ibragım Daýkesuly, Abaı oblysyndaǵy órt tótenshe jaǵdaı kezinde áreket etý júıesiniń qanshalyqty tıimsiz ekenin anyq kórsetti. Bul – aqıqat. Munymen daýlasýdyń da keregi joq.
Tarıhymyzda birinshi ret osyndaı (alapat) órtpen kúresip jatsaq, ol túsinikti bolar edi. Biraq jyl saıyn osyndaı jaǵdaı bolady. Byltyr kúzde Qostanaı oblysynda úlken órt boldy. 40 myńnan asa gektar orman, jer órtenip ketti, - dedi Máýlen Áshimbaev.
Senat spıkeri qurylymdar arasynda ózara úılesimniń joqtyǵyn aıtty.
Sizder prezıdent tapsyrmasyn oryndap jatyrmyz dep aqparat ta berdińizder. Biraq Abaı oblysyndaǵy jaǵdaı osy búkil júıeniń ýaqytyly áreket etpegenin, qurylymdar arasynda úılesimniń, tártiptiń joq ekenin anyq kórsetti. Osyǵan baılanysty osy salany túbegeıli ózgertetin, durystaıtyn ýaqyt keldi dep esepteımiz.
Prezıdenttiń tıisti tapsyrmalary bar. Áriptesterimiz baǵdarlama qabyldanady dep baıandama jasap jatyr. Basqa da sharalar qabyldanady. Tergeý jumystary júrip jatyr. Onyń qorytyndysy boıynsha biraz is-sharalar júıege asatyny sózsiz, - dedi Senat tóraǵasy.
Sondaı-aq, ol tótenshe jaǵdaı salasyna qomaqty qarjy bólinetinin de atap ótti.
Qazir bıýdjetti qarap jatyrmyz. Aldaǵy ýaqytta barlyq usynysty qoldap, tótenshe jaǵdaı kezinde áreket etetin barlyq qurylymdy qarjylandyrý úshin kelesi jyldyń bıýdjetine biraz qarjy engizemiz. Ol – júzdegen mlrd dollar. Bárimiz olardyń durys paıdalanýyn, olardyń maqsatty túrde jumsalýyn, nátıjesi bolýyn qamtamasyz etýimiz kerek, - dep qorytyndylady Máýlen Áshimbaev.
